| Nummer:oub0277 | Datum:4. Aug. 1420 | Overlevering:Editie | Vindplaats:Ostfriesisches Urkundenbuch, I, S. 237, nr. 277 |
Die Gemeinde Workum schliesst mit Ocko tom Brok, der Stadt Groningen, den Umlanden und Hindelopen einen ewigen Frieden.
Wy scepenen, raetslude ende ghemeenheit van Wolderkum[*] bekennen ende tugen mit desen openen breve, dat wy voer ons ende onse nacomelinge hebben ghegeven ende gheven mit desen selven breve den eersamen jonker Ocken van den Broek, sinen onderzaeten, den eersamen borgermesteren ende rade ende ghemene meente in Groningen, den praelaten, hovedingen, rechteren ende ghemene meente van Hunsege, Fivelge, Langwolt, Fredewolt ende Hummerse landen ende den van Hindelopen enen steden, vasten, truwen, kersteliken vrede ewelic to holden van datum desen breffs, toe varen ende to keren onder ons ende in onsen ghebede, lyffs ende guedes, to water ende to lande, in maneren als hiir na gescreven staet. In den eersten, dat wy se sullen vorderen by dage ende by nachte daer wy kunnen ende moegen. Item so sulle wy hem helpen keren ende wederstaen alle de ghene, de se beschedigen ende hem hinderlic syn na al onser macht; ende loven mede in desen selven breve desen vrede to verbeteren ende to verclaren tot allen tijden als hem ende ons zamentlyc dat nutte ende oirbar duncket sijn. Desen vorscr. vrede love wy stede ende vast to holden by onser ere ende truwe alse guede lude, voer ons ende voer alle de ghene, de om onsen willen doen of laten willen sonder argelist. In een orkunde so hebbe wy scepene, raedslude ende ghemeenheit van Wolderkum vorscr, onser kerspelssegel beneden an desen breeff ghehangen. Gegeven in den jaer ons Heren dusent vierhundert ende twyntich, des sonendage na vincula Petri.
