| Nummer:oub0287 | Datum:31. Jan. 1421 | Overlevering:Editie | Vindplaats:Ostfriesisches Urkundenbuch, I, S. 248, nr. 287 |
Der Hamburger Bürger Hermann Everth, als Bevollmächtigter mehrerer Hamburger Kaufleute, bekundet der Häuptlingsfrau Sibbe zu Norden, dass ihm die Güter aus den an der Norder Küste gestrandeten beiden Schiffen richtig ausgehändigt worden sind.
Witlich, kundich und apenbaer sy all den genen, de dussen brieff sehen offte hoeren lesen, dat ick Hermen Everth, borger tho Hamborch bekenne ihn dussen apenen brieff, dat ick my fruntlich hebbe vordragen und byn gescheden ihn frunschup van fruw Sibben, hoevetfruwe tho Norden, van des guides wegen, dat dar gebarget was van eren amptluiden und undersaeten uth den twen Hamborger scepen, de vorloeren und vorgingen under de Noerder sidt, welck guidt thohoerde mynen medeborgeren Ludeken van Gisen, Ludeken Nienhuiss, Arent Rike, Hinrick Heine und Timme Bremer, und my darnha gesant und mechtich makent hebben van der eergenoempten fruw Sibben mit frunschup tho schedende, und alsodane gebarget guidt, als em mach weder weerden, dat tho untfangende und up tho boerende, und oer beste darmede tho doende, und ock quidt tho schelden und quitantien tho geven vor anclage. Hirumme dan want ick van des vorgeschreven guedes wegen van der eergenoempten fruwen ihn fruntschup syn gescheden, also vorgeschreven iss, so schelde ick fry und quidt fruw Sibben, ere erffgenamen und ore undersaeten vor alle ahnsprake und naclage des vorgeschreven guedes wegen vor de vorgescreven luide und all der genen, den dusse vorscr. stucke offte saeke ahnroret offte anroeren moge, sunder alle argelist und niefunde. Tho merer getuechenisse und bekantenisse der waerheit, so hebbe ick Hermen Everdes ehrgenoempt myn ihngezegell mit willen beneden ahn dussen brieff hangen laten. Geschreven int jaer unses Heren dusent veerhundert und ihm een und twintichsten jaer, des frydages vor unse lieve Fruwe thor lichtmisse.
