| Nummer:oub0298 | Datum:27. Juni 1421 | Overlevering:Editie | Vindplaats:Ostfriesisches Urkundenbuch, I, S. 256, nr. 298 |
Herzog Johann von Baiern verleiht den Abgesandten Ocko's tom Brok, Sibet's von Rüstringen und der Stadt Groningen freies Geleit.
Johan by der gnaden Gods palensgrave op ten Ryn, hertoge in Beyeren, soon van Henegouwen, van Hollant, van Zelant enz. doen cond allen luden, dat wy hebben ghegeven ...raeden ende vrunden der stat van Groninghen, Ocken van den Brueke ende Sibet ut Ruestringhen tot vyftich personen toe, of daer en bynnen, een seker, vry, vast gheleide van velicheit lyffs ende guedes over all in den onsen te varen ende te keren, te merren[*] ende te dueren te water ende te lande velich by onss te komen, velich te wesen ende velich ons weder toe hues to scheiden ende te komene voer de van Texel, [*] de van Wyringhen[*] ende de van Dockum ende voer all man, sunderling voer alle de ghene, de om onsen willen doen ende laten willen ende zullen. Welk gheleide ende velicheit inghaen sall op sinte Peter ende Pawels dach naestkomende na date deses briefs ende sal dueren ende staen tot sinte Petersdage ad vincula naest komende ende den dach all sonder argelist hier en binnen, als op der twelf apostelen dach onse vrende to hebbene in de Grietzyle in Emesland, omme all daer to ontfanghen raide ende vrende der stat van Groningen, Ocken ende Sibet vorscr. velich by onss te brengene ende velich weder van daer to hues to brenghenen sonder yenich letzel, of moyelese. Ende weert zacke, dat deselven raede ende vrende der stat van Groningen, Ocken, ende Sibet vorscr. van weders noede nicht en kunden komen to hues, so sall hem dit vorscr. onse gheleide duren ende waren ter tyt doe, dat sy mit gueden ghemake ghecomen syn to hues of weder in de Grietzyle, all arghelist ende nye vonde zullen in desen onsen gheleide claerliken utghesproken wesen. In een orkunde van desen so heb wy onse signeet beneden op 't spacium des breefs ghedaen drucken in den jaer ons Heren dusent vier hondert een ende twyntich, des saterdaghes na sinte Johannes dach baptisten nativitatis.
