Die Häuptlinge von Gödens schliessen mit Sibet von Rüstringen Freundschaft und unterwerfen ihm die Kirche und das Kirchspiel Dykhausen.

Wy Boye unde Ede[*] gebrodere enkennen openbar in dussen breve vor uns unde unsse broder Olrik unde Hicken unde al unssen vrunden, dat wy myd walberadenden mode unde guden[*] willen uns vorplichtet hebben tho ewigen tiden myd guden frunschopen unde vasten geloven myd deme erzamen manne Sibete, hovetlynghe in Rustringen unde Ostringhen in dusser wize zo hir na gescreven steyt. To deme ersten, dat wy vorgescreven gebrodere scholet unde willet truweligen, vulmechtigen, myd lyve unde myd gude, unde myd allen des wy vermogen blyven by deme erzamen Sibete hovetlynge vorgescreven unde by zynen landen unnde vrunden, de he vordedingen wyl etc. Vorder zo scholle wy unde wyllet de kerken toe Dykhusen[*] myd deme kerspele tho Dykhusen blyven unde wezen laten by Sybete unde zynen erven to ewigen tiden unde en schollet unde en willet dar nemende up setten, dat en zi Sibete wytlich unde myd zynen guden wyllen unde vulborden. Ok zo en scholle wy nemende in deme kerspele tho Dykhusen de dar inne wonaftich zynd offte in Sibetes gebede van zynen undersaten beschedigen offte beschedigen laten van uns offte unsen frunden vorder dan wy rechte plycht an hebben. Vorder zo en scholle wy offte en willet gheineleye recht eder pandynghe don edder esschen an den kerspele tho Dykhusen anders dan unsse eghene erve utwiset unde yo dat kerspel tho Dykhusen laten tho blyvende by Sibete vorgenant unde zynen erven tho ewigen tyden. Dusse vorgescreven stucke unde articule love wo Boye unde Ede vorgescr. vor uns unde unsse brodere Olrick unde Hicken unde unssen frunden stede, vast, unvorbroken tho holdende zunder alle holperede, argelist unde nyevunde unde myd allen dat dessen breve krenken offte tho hynder komen mach, unde hebben dat na myd unssen utgestrekeden lyflyken vyngeren stavedes edes tho deme hilgen ghesworen unde hebben des tho tuge unsse ingesegele myd guden willen an dussen breff gehanghen, der unsse gebrodere vorgescr. nu tho tyden mede brukende zynd. Unde wy Wybet hovetlyng tho Ezense, [Onne tho Godensse, ][*] Hilmer Wibets zone, Heer Ommeken, Sibet tho Ochtsem, [*] [Sibet Wulferdes, ][*] Hilmer tho Repesholte, [*] bekennen openbar in dussen breve, dat alle dusse gededinghe unde articule vorg. gededinget unde ghehandelt zind myd unssen guden willen unde hetende, unde schollet unde willet dat mede holden helpen myd all unsser macht sunder argelist in aller wise zo Boye unde Ede vorgescr. dat Sibete vorgescr. vor em unde oren broderen unde frunden gelovet unde gesworen hebben, unde en willet de loffte unde articulen nerghen mede vorbreken unde vorkrenken, zunder eyn ittlig articul byzundern stede unde vast helpen tho holden myd alle unsser macht unde hulpe tho ewigen tiden, unde hebben dat gelovet unde gesworen rechtes stavedes edes the deme hilgen up dussen breff, unde hebben des eyn itzlig bysunderen to eynre vaster warheit unsse ingesegele an dussen breff heten hanghen. De gegeven is na Godes gebort alz men scrift dusent verhundert vif unde twyntich, up deme hilgen dage ascensionis Domini.

x

x

Fonds	Ostfriesisches Urkundenbuch, I
Fol.nr.	S. 296
Nr	333
Olim	Nach dem Orig. im Grossherzoglichen Archive zu Oldenburg. — Gedr. Ehrentraut, Fries. Archiv I, S. 147, mit dem falschen Jahre 1427.
Jaar	1425
Datumcode	AscDom

x

x

Commentaar	Die Siegel fehlen sämtlich. Es scheinen acht Siegel angehangen zu haben, was mit den in der Urkunde angegebenen sieben Namen nicht stimmen würde.

x

Materiaal	papier

x

Edities	E. Friedländer, Ostfriesisches Urkundenbuch I (Emden 1878), nr. 333