| Nummer:oub0408 | Datum:Sibetsburg, 28. Okt. 1432 | Overlevering:Editie | Vindplaats:Ostfriesisches Urkundenbuch, I, S. 377, nr. 408 |
Vorläufiger Friedensschluss zwischen Sibet von Rüstringen und der Stadt Bremen.
In deme jare unses Heren dusent verhundert twe unde dertich, uppe Symonis et Jude der hilge apostele dage, waren by deme ersamen Sybeth to Ostringe unde Rustringe hovetling uppe siner borch de vorsichtegen mannes her Johan Dannow, vicaries in der kerken to Bremen, unde Memmo van Langwerden, ratgever to Bute Jade, vulmechtich der stad Bremen, umme to ramende unde degedingende ene stede, vaste, ewige sone unde unvorbroken to holdene twuschen deme ersamen Sybete unde sinen vrenden unde der stad Bremen, welker sone geramet, degedinget unde vulmechtich besloten is in desser nagescr. wise: dat de ersame Sybeth unde sine vrendes van der enen syden unde de rad to Bremen van erer unde erer stad wegene van der anderen syde scholen unde wyllen komen vulmechtich uppe de Jade to Dowensee[*] myt achte sonesluden, vere van der enen syde unde vere van der anderen syden, de mechtich to wesende an beden tziiden by to settende, schedende unde to endegende in fruntschuppe offte in rechte alle twydracht, schelinge unde sake, de de is offte gewesen hevet in vortiiden twuschen den ersamen Sybete unde der stad Bremen, went dat kumpt to wedersdagen unde erer en deme anderen den des vorlanget den dach wytlyk to donde achte dage edder verten dage tovoren, utgesecht pentleke notsaken, de den dach hinderen mochten. Desse sone is to beiden tziiden angenomen stede, vast to ewigen tijden unvorbroken to holdene sunder alle argelist, intoge unde hulperede, utgenomen den schaden, den Elze unde de gesellen, de van des ersamen Sybetes wegene to der seewart sin, dan hebben offte don, er se wedder komen in des ersamen Sybetes havene unde sine macht dan na den tijden den Bremeren nicht to schadene, dewyle dat he orer mechtich is unde umme sinen wyllen wyllet don unde laten. In orkunde unde merer tuchnisse desse vorg. sone stede unde vast to holdene alze gude cristene lude, so hebbe ik Sybet myn ingesegel und wy borgermester und radmanne der stad Bremen unser stadingesegel to dessem breve ghehangen. Geven in jare unde dage alz boven gescreven steyt.
