| Nummer:oub0427 | Datum:21. Juni 1434 | Overlevering:Editie | Vindplaats:Ostfriesisches Urkundenbuch, I, S. 391, nr. 427 |
Alt- und Neu-Norderland, Harlingerland, Ostringen und Rüstringen vereinigen sich zu ewigem Frieden und versprechen einander Hülfe, Sorge für die Sicherheit der Strassen, Aufrechterhaltung der früheren Verträge mit den übrigen Ostfriesischen Ländern u. A. m.
In den namen unses Heren Jhesu Christi und syne gebenediede moder maget Maria unde alle Gades hilligen, de alle guide frie Fresen moet bewaren tho allen tiden. Kundich unde apenbaer sy allen guiden Christenluiden, de dussen brieff sehen offte hoeren lesen, dat wy inwoners, huisslinge und hoevetlinge ihn Norderlanden olde und nie, Harlinge, Oisteringe (und)1) Rustringe, uns fruntlichen, eendrachtichlichen hebben voreniget, thosamen vorbunden ihn enen vasten ewigen frede, unvorbraken tho holden um allen twidracht und unfrede, de dar gescheen sint tuschen uns ihn vortiden aldusdaner wise, dat wy mellcanderen bistandich wesen scholen ihn allen rechtveer-digen saeken, een jewelich huisslinck, hoevetlinck, geestliche personen und wertliche syn tho bruiken, dat em van rechte geboert, de ene dem anderen lyck und recht tho doende, de straten tho lande unde tho water vry und velich tho holden, nha unsen geboer, und de unrechtveerdigen luide nha landtrecht tho allen rechten tho dwingen und nemant gene quade luide vor tho entholden de tegen dat recht sint. Voertmeer so willen wy vorbenoempte lande mit dussen brieve den ersten vorbunde nicht krencken, men den vull und all sunder alle argelist tho holden, als wy gelavet hebben ihn zegelen (und)2) brieven mit den Ummelanden, als Eemseger, Brockmer, Auriker, Moermer, Lantzer, [*] Overledinger, Reiderlanden; und weert saeke, dat jemant Freesch offte Duitsch uns offte jenich landt vorbenoempt avervallen wulden mit unrechte, dat wille wy samptlichen malcanderen helpen keren, und malcanderen getreuwe frunde tho bliven, und alle rechtveerdige dinge tho starcken nha vorbunde und landtrechte und alle unrecht tho krencken, und weert dat jemant unlyck[*] geschege, dem in synen lande nicht gelick offte recht scheen muchte, des scholen de Ummelande one rechtes helpen, waer he dat claget und nemant synes sulves recht mit gewalt tho voeren. Ihn orkunde und vasticheit dusser waerheit, so hebben wy vorbenoempte lande unse ingezegell hangen laten ahn dussen brieff. Datum anno Domini dusent veerhundert und veer und deertich, den 21. dach Junii.
