| Nummer:oub0438 | Datum:19. Okt. 1434 | Overlevering:Editie | Vindplaats:Ostfriesisches Urkundenbuch, I, S. 399, nr. 438 |
Bolo Hagana schwört der Stadt Hamburg Urfehde.
Ik Bolo Hayana wonachtich in den Symeswolt[*] do wytlyck unde kundich allen guden luden myd dusser scryfft, dat ik hebbe vorzekert unde vorswaren unde jegenwardich myd dussen breve love unde swere, dat ik myd rade off dade, hemelich offte openbaer, nenerleyge wys en schael off wyl doen jegen de ersame staed to Hamborch, ere borgers unde jegen de staed to Emeden, eren hofftman off amptmaen des slotes, ere borgers, inwonere unde koepmaen, unde ere vyende nycht to sterkende, noch hoven noch husen jeghen den wyllen der erbenomeden steden off luden. Vortmer zo en schael ik off nemant van myner wegene hathen, [*] nyden off wreken de schattynge, schaden unde brand up der vorscreven stede, lude unde ere vrunt, de my ghescheen ys uth Eineden in der tyd, du Dethloff Bremer raedmaen in Hamborch unde in der tyd amptmaen to Emeden was. Alle dusse articule vorscr. schael unde wyl ik Bolo vorscr. unde myne vrunt stede, vaest unde unvorbrocklyck holden to ewygen tyden also gude krystene lude. Int orkunde der warheit so hebbe ik Bolo erbenomed, nachtem dat ik zulven neen insegel en bruke, vruntlyken ghebeden den ersamen gestlyken vadere in Gode unde prelaet, heren Dydericum, abt to Ile, unde Wyard, hofftling to Uphusen, dat se dussen breff van myner wegene hebben besegelt. Unde wy, Dydericus abt vorscr. umme vruntscop unde bede willen Bolen vorscr. hebben unse insegel unses officii unde ik Wyard vorscr. dessgelyck myn insegel doen wytlyek hangen beneden an dussen breff. Int jar unses Heren vyerteynhundert vyer unde dertich, dess anderen daghes na sunte Luce ewangelisten dach.
