| Nummer:oub0503 | Datum:1438 | Overlevering:Editie | Vindplaats:Ostfriesisches Urkundenbuch, I, S. 447, nr. 503 |
Reynt Syboltssoen legirt dem Kloster Marienkamp das Ettenland östlich, von Margens.
Ick Reynt Syboltssoen tughe ende bekenne in desen apenen brieve voer my ende voer myne rechte eerfghenamen, dat ick myt vryen wyllen ende mit voerdachten moede totter ere Godes in een ewich testament ome salicheit mynre sielen ende mynre olderen ende vrienden hebbe ghegeven den cloester ofte convente Marienkampe, anders ghehieten Esinghervelde, ran der Reguliers canoniken oerde, gheleghen in den kerspel van Ezens, een stucke landes ghehieten Ettenlant, gheleghen by Marghens opt oesten myt allen eyghendoem, recht ende ansprake, die ick an dessen lande voerscr. hebbe; welck voerscr. land my myt rechter eerftael van selighen Ynken Beven myns neven[*] dode anghecomen is. In een oerkunde ende tuech der waerheit, soe hebben hyr over ende an ghewesen her Heer ende heer Eylart, kircheren toe Ezens, ende her Thomas, praest toe Weenre, ende Menze Rembertssoen by Marghenze. Ende omme meerre tuechnisse der waerheit ende sekerheit deser dynghen, soe hebbe ick Reynt voerscr., want ick selven ghenen seghel en hebbe, ghebeden her Heren ende her Eylard kircheren toe Ezens vorscr., dat sy oer ingheseghelen hebben doen hanghen an dessen brieff. Ghegheven in den jaren ons Heren dusent vierhondert achte ende dertich, op der kirckmissen dach des cloesters voerscr.[*]
