| Nummer:oub0505 | Datum:8. Febr. 1439 | Overlevering:Editie | Vindplaats:Ostfriesisches Urkundenbuch, I, S. 448, nr. 505 |
Sywart Syboltssoen legirt dem Kloster Marienkamp ein Stück Landes, das Ettenland bei Margens.
Ick Sywert Syboltssoen tughe ende bekenne in denen apenen brieve voer my ende voer myne rechte eerfghenamen, dat ick myt vryen wille ende mit voerdachten mode totter ere Godes in een ewich testament om salicheit mynre sielen ende mynre olderen ende vrenden hebbe ghegeven den cloester ofte convente Marienkampe, anders ghehieten Esinghervelde, van der Reguliers canoniken oerde, gheleghen in den kerspel van Ezens, een stucke landes, ghehieten Ettenland, ghelegen by Merghenze opt oesten, myt allen eyghendom, recht ende ansprake, die ick an dessen lande voerscr. hebbe; welck vorscr. lant my myt rechter eerftael van selighen Ynken Beven, myns neven, dode anghecomen is, alle argeliste utghesproken. In een oerkunde ende tuech der waerheit, soe hebben hyr an ende over ghewesen her Hayng ende her Eylard, kircheren toe Ezens, ende Johannes coster toe Ezens ende Johann Twistranck; ende omme meerre tuechnisse der waerheit ende sekerheit deser dinghen, soe hebbe ick Sywart voerscr., want ick selven ghenen seghel en hebbe, ghebeden her Hayng ende her Eylard kircheren vorscr., dat si oer ingheseghelen hebben doen hanghen an desen brief. Ghegeven in den jaren dusent vierhondert ende neghen ende dertich, opten naesten sonnendach nae sunte Agathe der heilighe jonfren ende martelern.
