| Nummer:oub0517 | Datum:3. Aug. 1440 | Overlevering:Editie | Vindplaats:Ostfriesisches Urkundenbuch, I, S. 460, nr. 517 |
Der Häuptling Wiard zu Uphusen tauscht mit Lyuward Habbena zu Uttum Grundstücke im Miedelsumer Hammrich gegen andere im Feldern Hammrich aus.
Witlyk unde openbaer sy allen gueden lueden, de dessen breff zeyn offte horen lezen, dat ik Wyard hoeftling to Upphusen vor my unde vor myn kindere unde rechten ervende unde anervende gebaren offte ungebaren myd vorbedachten gueden moetwillen hebbe gedaen ene wessele unde buethenge myd Lyuwarde Habbena to Uttum wonachtich umme ene summa erves unde landes, als teyndehalleff gras in Mydelsummer hammerke in twen stucken, in Uterdike vyeff grase, unde vyefftehalleff gras Hillengaren geheten;[*] unde vor dyt vorscr. land hefft my Lyuward vorscr. weder gedaen in Phalringe hamrike by den Astinge weyge neghen grase landes, unde vor dat halve gras daer hefft my Lyuward vorscr. vor vornoget eyn summa geldes[*] unde wal to willen betaeld. Unde desse vorscr. wesselinge unde butinge loven wy Wyard unde Lyuward vorscr. malickanderen vor uns unde den unsen rechten erffnamen to ewygen tyden stede, vast unde unvorbraken to holdene unde to leveren, so men vryg land plecht to leverende, sunder alle argelist, hulprede unde nygevunde, de dessen vorbenompten articulen hinderlyk mochten wesen. Unde desses to groter bekantnisse unde tuchnisse desser vorscr. puntte hebbe ik Wyard vorscr. myn ingesegel vor my unde myne erffnamen witliken an dessen breff gehangen. Ind yaer unses Heren MoCCCCo unde XLo, up dem hilgen dage invencionis sancti Stephani prothomartiris.
