| Nummer:oub0523 | Datum:31. Mai 1441 | Overlevering:Editie | Vindplaats:Ostfriesisches Urkundenbuch, I, S. 464, nr. 523 |
Die Stadt Bremen bekundet, dass der Häuptling Hayo Harldes zu Jever sich verpflichtet habe, während der jetzigen Fehde alle durch die Unterhaltung der Söldner entstandenen Kosten zu ersetzen.
Wy borgermestere unde radmanne der stad Bremen bekennen unde betughen openbare in dessem breve, dat wy van Haye Harldes hovetling to Jever en scryv entfangen hebben, darup wy eme wynnen unde updreghen scholen in desser veyde in kosten, bere unde wes dar vurder upkomende wert, alz vere alz dat scryv keret unde wes wy eme also wytliken wynnen, updreghen unde den riteren unde soldeners to soldye unde vordele rede togesecht unde vorscreven hebben, unde noch mer riteren unde soldeners van uns scryvende unde toseggende werden, dat schal he uns alle wedder rychten, gelden unde betalen sunder jenigerleyge insaghe, unde wanner he uns dat also wedderlecht unde betalet hefft, so scholen wy unde wyllen eme dat vorg. scryv wedder antworden unde volgen laten. Des to tughe so hebben wy unser staed secretum gehangen to dessem breve. Geven na Godes bort verteynhundert jar darna in deme en unde vertegesten jare, des mydwekens vor Pinxsteren.
