| Nummer:oub0532 | Datum:22. Jan. 1442 | Overlevering:Editie | Vindplaats:Ostfriesisches Urkundenbuch, I, S. 470, nr. 532 |
Mehrere Ostfriesische Häuptlinge verbürgen sich bei Junker Ulrich von Emden, Norderland usw. für Tido von Upleward.
Wy Haitet to Husum hovetling, Hajo to Utersteweer, [*] Gayke to Hamswerum, Gholtet Onken unde Hadke Seben tho Pleghewert[*] bekennen openbar vor allesweme in dessen besegelden breve, dat wi mid samelder hand sint borge gheworden unde hebben ghelovet in gueder truwe deme ersamen juncker Ulrike to Emeden, Norderlandt, Ezense unde Awerke etc. hoeftlinge, vor Tide to Pleghewert, dat he em unde sinen erfnamen sunder argelist truweliken wil hebben alle vorworde unde handelinge, so he em lovet unde ghesworen heft na inholt zines besegelden breves, den he juncker Ulrike gegheven heft. Darto sind wy vorder borge van vyfhundert Rinsche gulden myn 18 R. g., de schal Tyde vorscr. bynnen 5 yar betalen; dat erste ghelt schal wesen hundert Rinsche gulden, dat hundert to vyf stige[*] gerekent up sunte Michaelis dach negest komende betald, darna alle yar so vele up desse vorscr. tiit beth so lange, das de gansse summe degher unde all betald in. Ock weert sake, dat Tyde vorscr. brecklick edder neddervellich hiiran wurde, dat God verbede, so schole wi vorbenomte borgen unde willen juncker Ulrike vorscr. offte zine erfnamen sunder alle weddersprake gheven mit samelder hand vif stige R. gulden in gueder betalinge. In orkunde der warheit, so hebben wy Haitet unde Hajo vorscr. um unser alle wegen unse inghesegelen willichliken hangen laten an dussen breve. Anno Domini MoCCCCoXLIIo, ipso die Vincentii martyris gloriosi.
