Die Partei des Tanno Duren verspricht dem Rath zu Bremen aus Dankbarkeit für den beim Friedensschluss mit Ulrich's Partei geleisteten Beistand, fortan die Bremer Kaufleute auf der Weser und sonst zu beschützen.
Wy Tanne unde Sybeth, brodere gheheten Duren, to Jevere, Lubbe Onneken unde Ede myn sone to Krypense hovetlinge bekennen unde betughen openbare in dessem breve vor allesweme, de ene seet offte horet lesen, dat wy uns umme sunderger vruntschup, gunste, vorder unde wyllen, den uns de ersame rad to Bremen, unse leven heren unde vrunde, in den veyden unde unwyllen, de wy myt Olrike to Esense, Ede Boynges to Dykhusen unde Tzirke to Fredeberghen hovetlinge unde den eren hadden, gedan unde bewiset hebben, myt deme sulven unde ersamen rade gutliken vorenet, vorplichtet unde vorwyllekoret hebben, vorplichten, vorenen unde vorwyllekoren in crafft desses breves, in mate unde wise alz nagescreven steyt. Ton ersten en scholen noch en wyllen wy Tanne, Sybet to Jevere, Lubbe unde Ede to Krypense hovetlinge unde unse erven den sekeren kopman unde alle de ghenne, de de stad Bremen myt eren kopenschuppen unde velingen up der Wesere unde anderswor to watere noch to lande vorsoken, nicht beschedegen noch jergen an vorvaren offte angrepen noch an lyve offte an gude. Unde wy en scholen noch en wyllen ok nemende husen, heghen noch jenigerleygewys upholden, de den vorg. kopman edder anders jenlende, de de vorg. stad Bremen vorsoken, beschedege unde ok nenewys beschedegen late, sunder wy scholen unde wyllen den kopman unde alle de ghenne, de de vorg. stad Bremen to watere offte to lande myt erer kopenschup unde hantteringen aff unde an vorsoken, de sin we de sin, truweliken na alle unser macht vorbidden, beschermen, vlotten, voren unde vorderen, ene gunstich unde behulpen wesen, dar ene des to donde is, myt den besten, dat wy moghen. Were aver, dat wy hirane brockhafftich worden unde desses nicht en helden, dat God vorbede, so scholen wy unde wyllen sodanne gebrek unde alle schaden darvan ghekomen in rechte offte vruntschuppe wedder rychten, ghelden unde betalen na seggene des genanten rades to Bremen. Ok scholen alle de breve, de wy deme genanten rade van Bremen vor date desses breves ghegheven hebben by vuller macht blyven unde den en schal desse breff to nenem hindere wesen. Alle desse vorgescreven stucke sampt unde en jewelk besunderen loven wy Tanne, Sybeth, Lubbe unde Ede hovetlinge vorben. vor uns unde unse erven deme genanten rade to Bremen in guden truwen, unde hebben dat so sulves myt unssen upgerichteden liffliken vingeren stavedes edes up dessen breff to den hilghen gesworen, stede, vast unde unvorbroken to holdene sunder jenigherleyge hulperede, nygevunde unde argelist. Des to tughe unde liggener orkunde so hebben wy Tanne, Sybeth, Lubbe unde Ede hovetlinge alle vorben. vor uns unde unse erven unse rechte ingesegele wytliken unde myt guden wyllen ghehangen to dessem breve. Gheven na Godes bort verteynhundert jar, darna in deme XLVIIIo jare, des sondages an deme hilgen avende sunte Johanse baptisteren.
x
| Edities |
E. Friedländer, Ostfriesisches Urkundenbuch I (Emden 1878), nr. 595 |
