| Nummer:oub0636 | Datum:Bargteheide, 23. Febr. 1451 | Overlevering:Editie | Vindplaats:Ostfriesisches Urkundenbuch, I, S. 553, nr. 636 |
Graf Gerd von Oldenburg und der Rath von Hamburg verbünden sich unter Vereinbarung der näheren Punkte, namentlich zur Unterwerfung des Auricher-, Norder-, Brokmer- und Emsigerlandes und zur Einnahme der Friedeburg und unter gegenseitigem Versprechen von Hülfstruppen, zur Fehde gegen Häuptling Ulrich von Norden.
Witlick sy alle den ghennen, de desse scrift zeen, horen edder lesen, dat wy Gherd van Godes gnaden, greve to Oldenborgh unde Delmenhorst an de enen, unde wy borghermeistere unde radmanne der stad Hamborgh an de anderen siden, dorch sulfwalt unde overdaet Olrickes to Noerden hovetlinghes uns teghens densulven Olricke, sine vrunde unde medehulpere, to hope satet unde vorbunden hebben, so dat wy ene unde sine vrunde veyden willen, und wy obgenomet Gherd, greve to Oldenborgh unde Delmenhorst, scholen deme rade to Hamborgh mit veerhundert perden unde mit unssen undersaten to vote na unsser macht volghen uppe unsse eighene eventure, unde truweliken helpen den erscreven Olricke, sine vrunde unde undersaten in Aureker, Noerder, Brokmer unde Emesingherlanden wonaftigh, undirdanich unde ghehorsam to makende, so dat se uns Gherde, greven to Oldenborgh unde Delmenhorst, unde uns borgermeisteren unde radmannen der stad Hamborgh nerghenane enteghen vallen, unde wan wy Gherd, greve to Oldenborgh unde Delmenhorst, mit den unssen in Fresland in des rades to Harnborg hulpe sint ghekomen, so schal de rad to Hamborg uns unde den unssen nodtroftighe kost und haveren bestellen, unde allent wes wy denne in den landen winnen an rove, vanghenen edder dingktale, darvan schal de raed to Hamborgh der kost unde des haveren tovoren sik vorhalen, unde wes dar denne van winste overblift, scholen wy vorgenomet Gherd, greve to Oldenborgh unde Delmenhorst, unde wy borghermeistere unde raedmanne der stad Hamborgh like delen. Doch so scholen wy vorgenomet Gherd, greve to Oldenborgh unde Delmenhorst, in den landen ninerleie eghendoem uns beholden Desgheliken scholen wy borghermeistere unde radmanne to Hamborgh deme vorgherorden junckheren Gherde to Oldenborgh etc. greven teinhundert weraftighe to troste unde hulpe senden unde helpen ome mit Gode de Vredeborgh winnen, oft wy moghen. Were ok, dat wy borghermeistere unde radmanne der stad Hamborgh erkanden, dat deme ergenomeden junckheren Gherde to Oldenborgh etc, greven in merer unde starker hulpe darto noet unde behoef worde, so scholen wy ome nach unsser eighenen erkantnisse starker hulpe schicken, so vor uns beide denne in van noden up unsse eghene kost unde eventure; wes wy ok darsulves an rove, vanghenen edder dingktale wynnen, dat scholen wy under uns ghelike delen, men de Vredeborgh unde wes darto behoret heft, schal by deme genomeden junckheren Gherde unde siner herschop bliven, unde dar scholen wy borghermeistere unde radmanne der stad Hamborgh uns nicht ansteken edder mede bekummeren, unde darvan schal de genomet junckher Gherd den coepmann truweliken beschermen unde der van Hamborgh undersaten, unde de se vordeghedingen, nicht beschedighen edder beschedighen laten. Ok schal de Vredeborch des rades to Hamborgh opene slot wesen to alle eren noden, so dat se sik daruth unde in moghen beschermen unde weren teghens allesweme, doch deme ergenomeden junckheren Gherde to Oldenborgh etc. greven nicht to vorvanghe unde schaden. Ok so schole wy Gherd to Oldenborgh etc. greve unde wy borghermeistere unde radmanne der stad Hamborgh unsser neen sik sunderghes mit dem vorgenomeden Olricke unde den, de dorch sinen willen to veide sint ghekomen, vreden edder sonen, wy sin denne samentliken in der sone bedeghedinghet unde begrepen. Unde welke tid wy Gherd to Oldenborgh etc. greve unde wy borghermeistere unde radmanne der stad Hamborgh uns mit Olricke vorbenomet unde sinen hulperen vreden unde sonen willen, so scholen wy borghermeistere und radmanne der stad Hamborgh unde unsse amptlude, de uppe Lenghen wonaftich sint, nicht vorbidden, vordeghedinghen, noch in bescherminghe nemen sunder des genomeden junckheren Gherdes vulbord unde willen. Alle vorscreven artikelle samentliken unde besunderen loven wy vorbenomet Gherd, greve to Oldenborgh unde Delmenhorst, den borghermeisteren unde radmannen der stad Hamborgh, unde wy borghermeistere unde radmanne der stad Hamborgh wedderumme deme vorgenomeden eddelen unde hochghebornen junckheren Gherd, greve to Oldenborgh unde Delmenhorst, stede vast unde unvorbroken to holdende, unde unsser en deel schal deme anderen in dessen saken alle dingk keren to deme besten sunder alle gheveerde. Desse vorscreven tohopesate unde vorbund sind twisschen uns beiden vorbenomeden parten ghedeghedinghet unde vorhandelt in den jaren na der bord Cristi verteinhundert jar, darna in deme en unde veftighesten jare, in sunte Mathie avende, binnen Berchteheide.[*] Des wy Gherd greve to Oldenborgh etc. unsse und wy borghermeistere unde radmanne der stad Hamborgh unsser stad ingheseghelle an dessen bref to ene groteren witlicheyd hanghen laten hebben; welker breve twe sin van eneme inneholde, der de ene by uns Gherde to Oldenborgh etc. greven unde de andere by uns borghermesteren und radmannen der stad Hamborgh is in vorwaringhe.
