| Nummer:oub0642 | Datum:Bremen, 15. Dez. 1451 | Overlevering:Editie | Vindplaats:Ostfriesisches Urkundenbuch, I, S. 558, nr. 642 |
Vorläufige Punktationen der Bevollmächtigten der Städte Lübeck und Stade und des Junkers Ulrich in der Streitsache des Letzteren mit der Stadt Hamburg.
In nomine Domini. Amen. Anno nativitatis eiusdem millesimo quadringentesimo quinquagesimo primo, indictione quarta decima, die vero Mercurii[*] quinta decima mensis Decembris, hora terciarum vel quasi, pontificatus sanctissimi in Christo patris et domini nostri, domini Nicolai, divina providentia pape quinti, anno quinto, in civitate Bremensi, in domo consulatus ibidem, in nostrorum notariorum infrascriptorum et validorum virorum Hilmer Fikensolt, Erp van Weyge, Cord de Kampe et Borges Bardewische armigerorum[*] testium ad hoc specialiter vocatorum et rogatorum presencia, coram honorabilibus viris Wigardo in Uphusen principali, Mauricio Canke in Dorninghe[*] ac Edone Bogens in Godense, procuratoribus honorabilis domicelli Olrici ac amicorum suorum ad dietam Bremensem specialiter missis et destinatis, personaliter constituti venerabiles[*] ac honorabiles viri, domini Johannes Luneborch proconsul, magister Arnoldus de Bremis utriusque iuris doctor sindicus, Bartoldus Witick consul inclite civitatis Lubicensis pro et nomine consulatuum tam dicte civitatis Lubicensis, quam opidi Stadensis dictis Wigardo principali ac Mauricio et Edoni procuratoribus dicti domicelli per organum dicti domini Johannis Luneborch proconsulis intimaverunt, notificaverunt et significaverunt, quod dictarum civitatis Lubicensis ac opidi Stadensis consulatus in obligacione, quam dicto domicello Olrico et suis amicis pro communitate Hamburgensi fecerunt, promiserunt et sigillarunt, videlicet de servando pacem ipsi Olrico et suis amicis et non attemptando contra eos usque ad dietam Bremensem nec celebratam de cetero stare non vellent. Sed si que dampna per ipsos Hamburgenses ipsi domicello Olrico et suis amicis a tempore obligacionis antedicte usque ad dietam Bremensem predictam fortasse facta essent, que literis clare possent documentari, pro illis nomine consulatuum predictorum statim et ante recessum eurem respondere et satisfacere offerebant. Deinde hora vesperarum prefate diei prelibati domini Johannes Luneborch proconsul, magister Arnoldus sindicus et Bartoldus Witick consul in nostrorum notariorum predictorum ac honorabilium virorum, domini Johannis Watervorer presbyteri et Hinrici Samervaed clerici, testium ad hoc vocatorum et rogatorum presencia, in dicta civitate Bremensi, in curia habitacionis venerabilis viri, domini Johannis Hellingstede, prepositi Bremensis, et coram eo similiter constituti repetendo sive resumendo eidem domino preposito verbotenus praescriptum actum, sic ut premittitur, ipsis Wigardo, Mauricio et Edoni principali et procuratoribus et coram ipsis factum statim, quia subiunxerunt, ipsum dominum prepositum principalem dicti Olrici fore et esse procuratorem et onus pro eo specialiter assumpsisse propterea, ut prefatis procuratoribus ita et sibi, quod de cetero in dicta obligacione pro Hamburgensibus usque ad dietam Bremensem facta consulatus Lubicensis et Stadensis stare non vellent, sed si que probabilia dampna, durante eorum obligacione, usque ad dictam dietam facta essent, illa resartiri et pro illis respondere se velle ad statim ac ante ipsorum recessum obtulerunt et dixerunt. Super quibus omnibus et singulis prefati Johannes proconsul, Arnoldus sindicus, Bartoldus consul, nomine consulatuum predictorum, sibi a nobis notariis infrascriptis unum vel plura publicum seu publica fieri pecierunt instrumentum et instrumenta. Acta sunt hec Bremis, anno, indictione, die, mense, hora, loco et pontificatu predictis, testibus supra dictis, ut premittitur, ad hoc vocatis et rogatis.
