Der Emder Bürger Swart Arnd verkauft dem Beneko von Aurich, Bürger zu Emden, Haus und Warf bei der Kreuzstrasse.
Wytlick, kundich unde openbar sy alle den ghenne, de dessen breff seen off horen lesen, wo ik Swart Arnd, borgher to Emeden, bekenne und betuge clarliken in der warheit vor allesweme in desser scrifft, dat ick myt vrien willen unde vorberaden mode hebbe vorkoft unde vorkope yeghenwordich in krafft desses breves to enen steden vasten ewigen erffkope deme bescheden manne Beneke van Awerke, borger to Emeden, en huss mytten werve gheleghen bi der Crucstrate up de westerziit negest olde Werneken Scroders huss zelger dechtnisse, daerto schal he mede bruken unde hebben de halve wand van desses vorbenanten Wernekens huss; unde de werff strecket sick van der straten beth an Johan van Duten achterhuss, unde heft in vortiiden tohord Dule Haringen selgher dechtnisse. Dit is samentliken ghekoft vor ene summe gheldes, de my desse sulve Beneke gutliken heft untricht unde wal betalt to mynen willen den ersten penning mitten lesten, so dat ick Arnd vorscr. unde myne erfnamen boren unde ungeboren scholen unde willen dessen vorbenanten Beneken unde sinen erfnamen dit vorg. huss unde werf mit der halven wand samentliken vri unde unbekummert warende wesen to ewighen tiiden vor alle ansprake ghestelikes unde werlsches rechtes sunder yenigerleie argelist, hulperede unde nye vunde. Des to tughe hebben hiir yegenwordich mede, bi, an unde over ghewesen Reymer armborsterer, Enghelke Kremer, Clawes Kock, Hermen Wanlo[*] unde anders vele gude lude. Des to merer witlicheit so hebbe ick broder Johan Egberti, gardyaen to Phalren, unses coventus (sic) ingesegel unde wii borgermesters to Emeden unse stadingesegel um bede[*] wille witliken hanghen heten to dessen breve. Screven na Godes borth MoCCCCoLIIIo yar, des anderen dages na unser leven Vrouwen daghe to lichtmisse.[*]
x
| Edities |
E. Friedländer, Ostfriesisches Urkundenbuch I (Emden 1878), nr. 655 |
