| Nummer:oub0685 | Datum:16. Jan. 1455 | Overlevering:Editie | Vindplaats:Ostfriesisches Urkundenbuch, I, S. 598, nr. 685 |
Der frühere Häuptling von Westerhusen Ewe bekundet, sich mit dem Häuptling Poppo Maninga und dessen Brüdern ausgesöhnt und zur Ausgleichung des nach schiedsrichterlichem Urtheile ihnen zukommenden Antheils an dem Streitobjekt im Werthe von 280 Postulatsgulden eine grössere Anzahl Ländereien übergeben zu haben.
Witlick und apenbar sy alle den ghenen, de dessen breff zeen offte horen lezen, dat ick Ewe wandages tho Westerhusen hovetling bekenne und betuge apenbar vor alseweme in dessen breve, dat ick my lefflekenn und vruntliken hebben gescheden myt deme eerzamen Poppe Maninghe to Bergum und Pewessum hovetling, Dyde und Edzert brodere umme sodanige schelynghe, unwille und twedracht, alzo in vortyden hefft gewesenn twischen uns, also van Ette und Hyssen seligen Lutet Maninge hovetlyng modersusters smydewerck, golt und nagelatenen gudere wegenen, des ick eme doch inn deme rechten plichtich was, so dat twischen uns gedinget hebben de ersame Imelo to Grimmersum und Hynte hoveling, Albertus kerckher to Hagha und Haro Tetten darsulves, ghekorne schedeslude van Poppe Manninghe und syner brodere weghen, hovetlinghe to Bergum und Pewessum, by der eenre zyd, und Snellgher to Uphusen hovelyng, Wiltatus kerckhere und Wyneko vicarius to Westerhusen ghekorne schedeslude von Ewe weghen vorbenoemt. So dat ick Ewe vorg. scal deme ersamen Poppe Manninghe, Dyde und Edzsert brodere hovetlinghe vorbenoemt van desses erghenompten ghudes weghenen geven und to wille betalen veerthein stighe postulatesgulden, dar ick em myt vrigen willen unbedwunghen und wolberadens modes anghegeven hebbe dyt nabescreven erve, dat inn Pewessemer hammercke licht, also hyr nagescreven steyt. Int erste elven grasen landes, de belegen sint ynen grote Legh-esch. item dre grasen belegen ynen lucke Legh-esch. Item vyff grase belegen ynen groben Wachtlande. Item seven grase belegen yne lange kompen. Item vyff grase belegen yne lucke Wachtlande. Item verdehalff grase belegen ynne Lemting. Item vyff grase yune Manningalande. Item dre grase ynne Wachtlande. Item noch dre grase ynne Wachtelande unde oeck enen werff, de gheheten is Enigheborch. Dit vorbenoemde erve licht tosamende in ener ettinge by Eningheborch in Pewessumer hammerke. Item noch derthein grase venlandes und een verendell gelegen by dem somerdycke und het de Bov-esch. Item noch derthein grase Luwertsnafen und licht an de Eletinchwey. Item theindehalff gras ynne Mamme Hibekene grote fen. Item noch thein grase belegen ynnen korten Steleckel. So dat ick Ewe vors. und myn erfnamen boren und ungheboren desse vorbenoemede Poppe Maningha, Dydo und Edzart broders hovetlinge und eren ervent dyt vorg. erve scholen und willen vrig und unbekummert warende wesen to ewighen tyden vor alle ansprake gestlick und wertlikes rechtes war und wanner em des noot und behoff is sunder yenigherleye arghelist, hulperede und nye vunde, de kegen dessen breff hinderen moghen. Desses to tuge hebben hyr yegenwordich mede, by, an und over ghewesen mester Bole tho Nesse, Hero Wesselen und Brunger to grote Midlum. In orkunde der warheit so hebbe ick Ewe vorbenomet myn ingesigell vor my und mynen erffnamen witliken und myt guden willen to dessen breve don hangen, und hebben ock vorder ghebeden umme merer tuchnisse der warheyt den ersamen Snelgher to Uphusen hovetling, Wiltatus kerckhere und Wyneko vicarius to Westerhusen dessen. breff van mynre weghen mede to beseghelende; und wy Snelgher, Wiltatus und Wyneko vorg. bekenne vor alsweme, dat wy umme Ewe bede willen vorbenomet unse ingeseghele lyffliken und myt guden willen hebben vor dissen breff gehangen. Gegheven und geschreven na der bort Christi dusent veerhundert, darna in deme vuff ende vefftighesten yare, an donderdaghe vor Anthonii monachi.
