| Nummer:oub0701 | Datum:21. April 1456 | Overlevering:Editie | Vindplaats:Ostfriesisches Urkundenbuch, I, S. 613, nr. 701 |
Beneko von Aurich verkauft dem Johann Kock sein Haus in Emden und verspricht ihm Gewährleistung.
Witlick, kundich unde openbar zii all den ghenne, de dessen breff zeen off horen lesen, wo ick Beneko van Auwerke bekenne unde tuge vor allesweme in crafft desses breves, dat ick mit vrien willen, vorberaden mode, mit consente myner echten hussvrouwen hebbe vorkofft unde vorkope yegenwardich in crafft desses breves to enen steden, vasten, ewighen kope deme beschedene manne Johan Kock myn huss sunder den werve bynnen Emeden, beleghen mit der halven want an de westerziide Werneke Scroders hues saligher dechtnisse, dar he up bouwen mach sunder yenigherleie tosegghen, dar Remed Redertsna huss liick yeghenover steit up de westerziide, unde is samptliken ghekofft vor enen summen gheldes, den my desse vorscr. Johan guetliken hefft untricht unde wal betaelt den eersten pennynck mitten lesten, des ick een dancke; unde weer yemant, de up dit vorscr. hues in tokomen tiiden dachte anclage to doende van desses kopes wegene, des ick my doch nicht vormode, zo schal ick Beneke vorscr. unde wil, edder myne rechte erffnamen, boren off ungheboren, dessen vorbenanten Johan edder syn kynderen off erffnamen, boren off ungheboren, edder holder desses breves mit rechte dit vorscr. hues mit der want vri quiit unde schadeloes to ewigen tiiden vor alle ansprake gheestlikes edder werlsches rechtes holden sunder alle argelist, hulperede unde nye funde. Hiir an unde over hebben ghewesen Hermen van Berghen, Werneko Scroder, Roleff Scroder, borghers in Emeden, und anders veler gueder lude. In orkunde der warheit so (hebbe)[*] ick Beneko vorscr. vruntliken ghebeden Albert Tiideken, Johan van Winsen, Meio Tiadmersna unde Johan van Duthe, borghermesters in Emeden, dessen breff van myner wegen to beseghelen, unde wy borghermesters vorbenant bekennen in desser scrifft, dat wy um bede willen Benekens ergenant unse stadingesegel witliken hebben heten hanghen vor dessen breff. Na der bord Cristi MoCCCCoLVIo, des mydweken vor sunte Juriens dage.
