| Nummer:oub0729 | Datum:28. März 1458 | Overlevering:Editie | Vindplaats:Ostfriesisches Urkundenbuch, I, S. 633, nr. 729 |
Bürgermeister und Rath zu Hamburg genehmigen, dass Junker Ulrich an den Schlössern zu Emden und Leerort einige nothwendige Reparaturbauten vornehme.
Wii borghermeistere unde radmanne to Hamborgh bekennen openbare in unde mit desseme breve, alse wii deme erbaren junckheren Olricke, to Noerden, in de Greet, Aureke etc. hovetlinghe, unsse slote Emeden unde Lerorde mit eren tobehoringhen inghedan unde in vorwaringhe andwerdet hebben na lude etliker bezeghelden brave darover gheven, darane undir anderen mede is utghedrucket, dat he in den sloten nichtes buwen schole, ane id sche mit unsseme vulborde unde willen, so heft uns de obgenomede junckher Olrick laten biibringhen, wo de staven unde dat langhe hues to Emeden buwinghe unde vorbeteringhe behoven, unde dat ok in vorsettinghen, palinghe unde anderen nottroftighen reden buwen to Lerorde ghebreck sii, dat men ok vorbeteren mote; des hebben wii toghelaten, ghunt unde orlovet, laten to, ghunnen unde orloven deme vilgenomeden junckhern Olricke, wes he in der muren des slotes, Emeden in dat westen vorbetert heft unde noch wert vorbeterende, unde dat he den staven unde dat langhe hues darsulves buwen unde vorbeteren unde ok wes in den vorsettinghen, palinghen unde buwten to Lerorde nottroftighen to vorbeterende sii, maken unde vorbeteren laten moghe, unde umme sodane buwinghe unde vorbeteringhe schal id staen, alse in deme hovetbreve, darane wii eme de slote vorzegheld hebben, steid uthgedrucket. To openbarer tuchnisse desser sake hebben wii unsser stad secrete heten henghen to desseme breve. Na der bord Cristi verteinhundert jar, darna in deme achte unde veftighesten jare, des dinxstdaghes vor Passchen.
