| Nummer:oub0773 | Datum:22. Juli 1461 | Overlevering:Editie | Vindplaats:Ostfriesisches Urkundenbuch, I, S. 669, nr. 773 |
Schiedsspruch in dem Streite zwischen den Häuptlingen Wiard zu Oldersum und Uphusen und Gerd zu Petkum über das Eigenthumsrecht an Petkum, welches unter Aufführung der näheren Bedingungen dem Gerd zuerkannt wird.
Wi Johannes Vredewolt, decretorum doctor, provest tho Emeden und kerckher tho Groningen etc., Sibo tho Dornum, Esense, Stedesdorpe und Witmunde hovetling, Bebbo provest und kerckher tho Groethusen, Albertus tho Hagen kerckheer, Tanno Kancken tho Dornum und Hayo thor Papenborch hovetling, provest tho Leher, gekoren und vulmechtigen belevede schedeslude in den verrisen schelingen und twidrachten tusschen Wyardt tho Uphusen, hovetling tho Oldersum, em und sinen erven unde siner frunden, de des tho doende hebben mogen up ein, unde Gherde tho Petkum hovetling, em und sinnen erven und sine frunden, de des ock tho doende hebben mogen up ander syd wesende, enkennen und betuigen apenbaer an dessen breve voer allen ersamen vromen luiden, de ene sehen, horen offte lesen, wo dat wi mit inrame und seggende des ersamen walgebornen unsen gnedigen junckheren Olrichs tho Greetzyl, Norden, Awercke, Emden etc. in Oestfrieslande hovetling, als eines gekornen und vullmechtigen overmans an desser vorgeroerden schelinge und twidrachten, einen entliken slote, fruntschup und ganslike schedinge vorramet und uthgespraken hebben an ewigen tyden unvorbroken tho holdende, bi lofften und pennen, alse desse vorbenante parte an einen sunderlycken breve malckander gelavet und versegelt hebben. Int ersten, so hebben wi vorbenante schedesheren alle schedinge tusschen desse vorbenoemde parten, de wi doende werden an dessen breve, gewiset und wisende jegenwordich vullenkaemlich bi den lofften und penen, als de erste breeff inholdend is, tho beholdende ane all gebreck offte intoch. Item so schullen Gerd tho Petkum und sine erven voer alle ansprake, de he up Wyard hefft off hebben muchte, tho ewigen tiden beholden und hebben dat loech tho Petkum mit heerlicheit und gebede sunder Wyardes offte jemendes van syner wegen hinder. Darmede schall ganslycken geslichtet und in fruntschup voreiniget wesen tho einen entliken vullenkamen ende und slete alle unwille, twidraeht und klage, de went up dessen jegenwordigen dach, alse dat datum desses breves inholt, tusken den vorbenanten parten und eren olderen thovoren upgestaen und verresen syn gewesen, de syn van wundinge offte hure, mit breven off tugen, bewysslick off unbewysslick, warvan dat de syn, schullen alle nu jegenwordich daelgelecht wesen und geslichtet, und na dussen dage nene klage up malckanderen darumme mehr tho doende, beholden dat Wyardt und sine erven schullen alle jaer so veele koen van Petkumerloghe tho rente hebben, alse se aldus lange darvan gehat hefft. Vorder so schullen Wyerdt und sine erven warschop doen des erves, dat he em voer dat erve wedder gewiset hefft, dat he van Gerdes erve vorkofft hadde, offte de vorb. Wyerd und syne erven scholen Gerde und syne erven andere erven so goedt in de stede wedder leveren. Vurder als denn Hayko Wyards sone veer grese landes yn syne weren hefft tuschen der borch tho Wyddelswer und dem dycke belegen, dar Gerdt up klaget, seggen und wysen wy vorb. schedesheren up vorschedinge, so dat Gerdt schall sulke ansprake bewysen, dat syne olderen dat land yn weren und eigendom gehadt hebben, schal Wyard und syn soen vorscr. Gerde dat land den volgen laten ane vortreck. Ock alse de vorb. Wyard und Gerdt umme erve gewesselt hebben, van welker wesle Gerd is noch derdehalf gres klagen tho achteren, seggen wy vorb. schedesheren und wysen vor vrundtlicke schedinge so, ift Wyardt de wessele holden wyll, schall he des Gerde leveren und wysen 3 grese tho brueken in syn besyd tho synen beleve, is over em de wessel nicht belevet, schullen se denn malkanderen der wesle qwydt schelden. Ock so schullen alle olde klage, de Gerd vorscr. up seligen Enen kinderen tho Petkum gehadt hefft und hebben muchte, genslyken gedodet und neddergelecht wesen und geslichtet, behalven de dode hals schall staen uppe settent und schedinge des overmans und des schedesheren, und so scholen saligen Ener kinder rustliken und vredelyken sitten und wonen an eren huse tho Petkum, dat ere lyk anderen guden Petkumer buren tho brukende ane vaer und hinder, und her Nono saligen Enen soen schall mit synen gude vredelyken by der kerken tho Suderhusen blyven und de beholden ane Gerdes insage. Ock so mach Wyard und schall allen upkomenen und vorschenen broke manen, de em wente nu thor tydt tho Petkum vorgeschreven in gewesen. To orkunde und merer tuchenisse alle deser vorb. puncten und schedinghe hebben wy Olrick tho Greetzyll, Norden, Awerke, Embden etc. in Ostvreeslandt hovetling, als ein vulmechtich overman to dessen vorb. saken und schedinge, und wy Johannes Vredenwolt, Sybo, Bebbo, Albertus, Tanno und Hayo, alse vulmechtige koren schedesheren to dessen upgen. schedinge und saken, hebben unse rechten segele wytliken doen hanghen toe dissen breff, des wy Wyard und Hayko syn soen, ik Haro vor my und mynen broder Hayken und um samentliken vor unse erven, und ick Gerd erbenant vor my und myne erven under unsen ingeseghell hir angehangen, bekennen und beleven vullentkomentliken tho holden in vorgerorder wise alle articule und puncte desses breves sunder argelist off yenigerleye intoch offte nye vunde, dar men dessen breff mede krenken mochte. Datum anno Domini MoCCCCoLXIo, ipso die beate Marie Magdalene.[*]
