| Nummer:oub0775 | Datum:1461 | Overlevering:Editie | Vindplaats:Ostfriesisches Urkundenbuch, I, S. 674, nr. 775 |
Concept eines Vertragsentwurfes über den völligen Verzicht Hamburgs an Schloss und Stadt Emden und Schloss Leerort gegen allerlei Leistungen Junker Ulrichs.
Wii borgermeistere und radmanne der stad Hamborch bekennen und betugen opembar in in desseme breve vor uns, unse nakomene und allesweme, dat wii umme mennigerhande sake, beqwemicheide und guder eendracht willen deme erbaren juncheren Olrike to Noerden, Berum, Aurike etc. hovetlinge, und synen rechten erven, allen egendoem, ervetael und rechticheide, de wii in unsen sloeten Emeden, Leeroerde, der stad Emeden und allen oren guderen, rechticheiden und tobehoringen nichtes uthbescheden, und desulve juncher Olrick nu van uns to etliken jaren na inholde etliker breve van eme uns darupp gegeven uppe slodloven inne hefft, genssliken uppgedragen, vorlaten und vortegen hebben, updregen, vorlaten und vortigen jegenwardich in macht dessen breves, so dat desulve juncher Olrick, und syne rechten erven, boren und ungeboren, sodanne sloete Emeden, Leerorde, de stad Emeden, alle orer gudere, rechticheide und tobehoringe, nichtes uthbescheden, darmede doen und laten, laten und doen mogen to ewighen tiiden, so on dat belevet, sunder allen unsen, unser nakomene weten, willen edder jenigerleye vulbord. Hiir enteghen umme sodanner woldaet willen, so schal und wil de erben. juncher Olrick und syne erven scholen und willen uns, unse nakomene, borgere, inwonre, undersaten, unsen kopman und de ore in allen enden to watere unde to lande truweliken vorbidden, vordegedingen und vor schaden bewaren, unse borgere, inwonre, undersaten und unsen kopman und de ore, ok eere beer und gudere mit nenerleige beswaringen belasten, na inneholde unde uthwisinge etliker vorsegelder breve van deme erben. juncheren Olrike uns darup to den tiiden, do wii eme desulven sloete unde stad Emeden und Leeroerde uppe slodloven mit allen oren tobehoringen to guder hoede in vorwaringe deden, ame jare na Christi unses Heren bord XIIIIC, darna in deme[*] ... jare vorsegelt gegeven, desulfften sodanen breve in allen oren luden und tenoren scholen gantz unvorbroken mit desseme breve edder desse mit den, unghezerighet, sunder overall heel vulmechtich bliven, und nerghen mede in alle eren puncten, stucken und artikelen vorbroken wesen, uthbescheden allene sodanne artikel in densulfften breven uthedrucket berorende, dat wii und unse nakomene, de erben. sloete und stad Emeden und Leerorde na vorlope sestein jar wedderlozen mogen, de artikel allene und nene mehr in sodanen breve uthedrucket, mit desseme breve schal gensliken delghet, doedet und van nenerleye werde wesen. Ok so scholen wii sodanne gelt, alse teynduscnt Postulatusgulden, de juncher Olrick vorben. uns uppe desulven slote, stad und ore tobehoringe gedaen hefft, degher unde all to ewigen tiiden sunder jenigerleie dessulven juncheren Olrikes und syner erven edder jemendes anders van orer wegene maninge und wedderesschinge rouweliken unde vredezam behoelden ane alle gheverde. Unde hiirmede so schal alle unwille, swisticheit und tosaghe, de desulve juncher Olrick und syne erven teghen uns, unse borgere, inwoner, undersaten unde kopman, edder wii wedderumme teghen ene, de syne, unser eyn teghen den anderen hebben, de heerto wente uppe dessen dach jenigerleye wiis moghen irstanden und resen, wadanik de sii, effte wesen mogen, gensliken vorevend, vorliikend und biigelecht wesen, in aller mathe, mannere und wiise efft de ny uppestanden edder irresen weren. Alle desse vorscreven stucke...[*]
