| Nummer:oub0890 | Datum:20. Juni 1470 | Overlevering:Editie | Vindplaats:Ostfriesisches Urkundenbuch, I, S. 768, nr. 890 |
Andere Beurkundung der letztwilligen Verfügungen und Klagepunkte Adda's.
In nomine Domini. Amen. Anno millesimo quadringentesimo septuagesimo, in profesto salutiferi corporis Christi, in presentia venerabilium personarum prelatorum, domini Bernardi, abbatis in valle gloriose Virginis, fratris Everhardi, prioris conventus Predicatorum in Norda, necnon aliorum presbiterorum, domini Hermanni, capellani in Haga, domini Poptati, praebendarii ibidem, veridicorumque virorum Markel Tettena, Haitet de Husum, Tiarck Uldinge, Manne Ercken, Tyarck Harlsena[*] una cum ceteris fidedignis, commendabilis et honesta domina Adda, vidua relicta Lutati Manninga, capitalis inantea in Bergum et castro ibidem felicis recordationis, statuit et ordinari fecit suum testamentum, committens de plenitudine naturalis confidentiae suis filiis et filiae superstitibus funeralia sibi decentia cum exequiarum solutionibus aliorumque piorum operum pro salute animae suae faciendorum suis temporibusque locis fiendorum, perstringens una cum hiis plerumque, ubi maius imminet periculum, ibi cautius est agendum. Et quia dum molesta quam planes (sic) dissensionem super bonis sibi debitis ex parte Tiacqwen mobilibus et immobilibus, timens vero ultra, quod discordia praeceps dilatare posset terminos iniustitiae contra limites iustitiae: huic ergo controversiae obviare volens, refrenando hanc habenis rationis ministravit formam pacificae et iustae compositionis. Et sicuti persaepe sana corpore, sic in lecto aegritudinis sana mente, ut sequitur, secundum hanc texuit materiem verborum: Ego Adda iusto titulo monitionis conqueror super magnifica domina Teden, comitissa, generosisque filiis et filiabus ex parte Tyatqwen. Inprimis super quarta parte in Gredis cum structura et arvis. Item in Pilsum super quarta parte agrorum. Item super quarta parte cum aedificiis et agris in Manslacht et medietate utensilium domus et medietate ornamentorum aureorum, deauratorum vel argenteorum, sicut honestam dominam decet, vulgari vocabulo eyn pale, ene orringer, en span, en eschart, en boger, achte strengede ringe, en gulden mantel cum alio ornatu argenteo, sicut decet honestam dominam, cum medietate vasorum propinandi aptorum. Insuper quarta parte in Berum, videlicet arvis et aedificiis, uti quondam fuerunt aedificia in Gredis, Manslacht et Berum. Rursum in casu, quo placuerit amicabilis compositio utrique parti, omnia praescripta conglutinabuntur et poni debent sub estimatione sex vigenarum florenorum Rhenensium annuatim in certis redditibus sublevandorum. Et etiam insolvantur mille floreni Rhenenses pro ornamentis aureis, deauratis vel argenteis utensilibus domorum et aedificiis. Et ut addatur de vasis propinatoriis e duobus unum, vulgariter dat yrs ey offte de pellican. Et quidquid tractandum est de redditibus annuatim retentis, hoc remitti debet ad dictamen virorum discretorum. Verumtamen si honorificae dominae Teden, suis dilectis filiis et filiabus, onmia praescripta distracta nimium et gravia visa fuerint, filii mei dirigi debent secundum informationem plebisciti terrae et bonorum hominum. In quorum testimonium et firmioris roboris evidentiam ego Dithmarus in Pewsum curam gerens pastoralem (utinam bene meritus) quia interfui, audivi haec ita fieri, consonum reputavi praesentia cum appensione mei proprii sigilli munienda. Anno et die praescripto.
