| Nummer:oub0899 | Datum:Emden, 29. Aug. 1461 | Overlevering:Editie | Vindplaats:Ostfriesisches Urkundenbuch, II, S. 3, nr. 899 |
Schiedsspruch des Propstes Johannes von Emden und der Häuptlinge Sibo von Dornum, Hayo von Papenburg und Beno von Uttum zur definitiven Beilegung des Streites zwischen der Gräfin Theda und ihren Brüdern und den Erben Wiards von Oldersum wegen Wolthusen und Oldersum.
Wy Johannes Vredewolt, decretorum doctor, proest to Emeden, Sybo van Dornum ritter, to Esense unde Witmunde hovetlingh, Haye tor Papenborch unde Beno to Utthum, hovetlinghe, enkennen unde doen kundich allen, de desse nottelen zehen offte hoeren lezen, soe alze salighe greve Oelryck unse leve here in voirtyden, unde salige Wyard to Oldersum hovetling, hadden gehat ghebreke unde twischelinghe umme der eddelen vrowe Theden, grevynnen, unde erer broeder Ocken unde Kenen erve unde land to Oldersum, als dan de twidracht tuschen unsen leven salighen heren van vrowe Theden unde erer broeder weghen unde salige Wyardes kynderen waert vormiddest erbaern, ersamen und vromen degedingeslueden ghevlegen, dair voirt zerter up ghemaket synd, unde salighen Wyardes kynder solden hebben unde beholden dat erve to Oldersum, unde se gheven wedderumme in ene wesselinghe vrowe Theden vorben. unde eren broederen twelff stige grase landes to Wolthusen, unde hyr en boven noch schelinghe ende twidracht was ghebleven van den naestallighen huren van den erve to Oldersum, unde oek dattet erve to Wolthusen beter was, dan dat erve to Oldersum, des wy Johannes Vredewolt proest, Sybo ritter, Haye unde Beno hovetlinge vorg., ghekorne unde vulmechtighe schedeslude, vrowe Theden, ere broedere, unde saligen Wyardes kynder unde syn soens kynder dairinne entlyken hebben vorlyket unde vruntliken ghesleten to enen alinghen ende in desser wyse: Als das de summa der naestandighen hure van den erve to Oldersum was achte unde twintich hundert Arnsgulden, dair dan salighe greve Ulryck an hadde entfangen groete unde lutke Phallerne, werven unde ander erve etc. unde gelt in betalinghe, soe dat Wyardes kynder unde kyndeskynder noch schuldich bleven vrowe Theden unde eren broederen neghenteyndehalfhundert Arnsgulden unde teyn gulden, soe hebben wy ghekend, ghefunden unde uthghesproken, als voir dat dat erve to Wolthusen beter ys, dair sollen Wyardes kynder unde kyndeskynder voir en bynnen beholden vifftehalffhundert unde teyn Arnsgulden, unde soe schollen ze voirtan betalen unde gheven vrowe Theden, Kenen unde Ocken eren broederen, vierteynhundert Arnsgulden in viff jaren to viff termynen, alze uppe itlickes sunte Mertens dach; nu des ersten sunte Merten nae datum deser nottelen drehundert Arnsgulden in gueden gelde in der stad Emeden; des andern sunte Merten drehundert Arnsgulden, des derden drehundert Arnsgulden unde des vierden sunte Mertens daghe drehundert Arnsgulden unde des vifften sunte Mertens daghe twehundert Arnsgulden all bynnen Emeden; unde dat erste ghelt itlickes termyns schal des anderen gheldes borghe wesen; unde weer saeke, dat jenich termyn vorsumet unde dan nicht betaelt en woerde, soe sal de erst betaelde summa ende termyn vorloren unde to vorgheves uthghegeven wesen; unde soe scholdet wedderumme komen uppe den ersten principaelsummen, by namen uppe de achte unde twintich hundert Arnsgulden, den de voirb. Wyardes kinder danne noch betalen unde uthgeven solden upt nyge; unde se moghen sick richten unde holden to den erve to Oldersum nae inneholt des rechten ervenregisters. Is sake, dat jemant van eren undersaten wes hebbe van den erve myd unrechte, dair moeghen ze sick inne holden soe geboerlick ys, unde hevet oek jemant van vrowe Theden undersaten wes van den erve myd unrechte, dair wil ere gnade en guedes rechtes up helpen. Hyr weren medy by unde over voir tueghe de ersamen Gherd to Petkum, Hero Maurizes to Dornum unde Snelgher to Uphusen, hovetlinghe. Unde desses to merer ghetuechnisse zynd desser nottelen twe, de ene uth der anderen ghesneden dorch dat woert equitas, des eyn itlick part der ene to sick ghenomen hebben. Ghescheen unde ghegheven to Emeden uppe der borch, nae der boert Christi vierteynhundert jaer, dairnae in deme eyn unde tsestigesten, uppe den dach decollacionis Johannis.
