| Nummer:oub0903 | Datum:17. Jan. 1472 | Overlevering:Editie | Vindplaats:Ostfriesisches Urkundenbuch, II, S. 6, nr. 903 |
Das Kloster Ihlo erhält von der Witwe Hebe Eltetsna zu Petkum 6 Diemath Meedlandes im Marienwehrster Hammrich, die Meckedobben, zum Geschenk.
Wy Theodardus van Repsholte, kerckheere to Auwerke, Hermannus, vicarius darsulves, bekennen unde betughen openbaer myt dessen beseghelden breve, dat wy daerby over unde (an hebben) [*] gheweesen, dat de eersame wedue Hebe Eltetsena, to Pectum wonafftich, myt vryen w(yllen unde) welberaden, ghesundes lives, gaende unde staende, andachtich ere zyele unde erer older zyelen (zelicheyt hee)ft overgheven unde in unse yeghenwoerdicheit overgaff myt hande unde myt monde den (abb)eth unde den convente to Ile ses deymethe meedlandes, gheheten Meckedobben, gheleghen in Mari(enweerster) hammerke. Oeck so wolde Hebe voerscr., dat desse voirscrevenen gave solde stede vast unde ongheb(roken) to (eren) gheholden unde dat zy noch nement van erer wegene solde desse voerscr. gave wederro(pen) offte (yen)igherleye wys moghen bestraffen offte behynderen in tokomene tyden sunder arghelist. Hiir (hebben) oe(ck m)ede (by) over unde an als tugheslude Helmerick Toelkena unde Claevs Block to Auwerke, (Jurys?) schypmaker to Emeden unde Johan Vorlynck unde Otto to Monekeborgum. In kennisse desser wae(rheyt hebben wy) unse ingheseghele witliken doen hangen an dessen breve. Ghescreven in den jaer unses H(eren dusent) vierhundert twee unde tseventich, des vrydaghes up sunte Anthonius daghe, sancti et gloriosi confessoris.
