| Nummer:oub0924 | Datum:1473 | Overlevering:Editie | Vindplaats:Ostfriesisches Urkundenbuch, II, S. 23, nr. 924 |
Schutz- und Trutzbündniss auf 20 Jahre zwischen Ostfriesland unter der Führung der Gräfin Theda und der vornehmsten Häuptlinge einerseits und Groningen und einigen Friesischen Landschaften andererseits wider den Herzog von Burgund.
Wy Thede grevinne in Oestfriesland, Sybo van Dornum, ritter, to Ezense, Stedestorpe und Wittmunde, Poppo Mannynghe to Pewesum, Ede Wymekens to Jeveren, in Waninglande, Oestringen und Rustringen, Ede Boyngsen to Guedense, Lubbe Onnekens to Krypense, Alke to Inehusen, hovetlingen, ende ghemenen hovetlingen unde meente in Oestfriesland an de ene, borgermeysteren unde rayd der stad Groenyngen, hoevetlingen, rechteren und ghemene meente van Hunsynghe, Fywelinghe, Langewolt unde Hummerse landen up de anderen syden, bekennen in dessen openen breve voir uns ende unse rechte erffghenamen ende nakomelingen ende der wy myd rechte mechtich synd, dat wy myd malckanderen vruntlicken unde lefflycken synd vorenyghet, vordragen, overgekomen ende by kerstlichen truwen unde eren vorbonden in maneren und formen hyr naebescreven. In den ersten, offte dat to jenigen tyden ghevelle, dat God vorbeden moete, dat de hoechgeborne unde mogende forste und here, de hertoch van Burgondien unde Braband, greve in Holland, Zeland und Hennegowen etc. effte jemant anders van synen wegene myd synen hulperen unse vorg. Vriesland offte stad van Gronynghen krafftliche und moghentliche dachte to overfallen, under syne herlicheyde ende to synen handen to brenghende, ende uns, unse herlicheyden ende vrygheiden to bekrenckenen, soe willen und loven wy vorg. malckanderen bystand to done ende bystandich to wesene, den vorg. hertogen und greven ende synen hulperen wedderstand to done, vrig und vresch myd der stad vorg. in eren vrygheyden ende rechten to vordedyngen ende to beschermen ende myd krafftlicher hand ende myd rechte. Soe to vorstane soe welck ende desser vorg. landen unde stad de hertoch ende syne hulpere bestalde offte anlegede, soe sollen de anderen, de unbelegen ende unbelastet weren, den belegeden und belasteden to hulpe und to troeste komen van stunden an, wanner se des vormaend woerden, in achte dagen dairnaest komende myd dusend werafftiger wal ghewapender mans up eres selves aventuer ende soldye alletyd, ende up des ghenen kost, de se uthsande hen to der tyd, dat se an de anderen syden der Emese komende woerden, ende dairnae up des ghenen kost, den se to hulpe worden gesand, nochtan beholdelich boven dessen ghetale offte de unbelegeden unbelastet ende unbeduchtet bleven van unwillen ende overfallen, soe solden de unbelasteden den belasteden to hulpe komen myd alle erer macht lande van stede, doch myd volke wal vorwaert in den se des myd breve und zegele vormaend woerden; sunder werd sake, dat de vorscr. hertoghe und greve ende syne hulperen uns ghelyke to water und to lande bestallede ende belegede, und des in laste weren, soe moste itlick voir sich sulves raeden und weren, beholdelich der vorg. gueder gunst itlick den anderen to starkenen nae syne vormoghen bueten sorghe ende vorlues erer lande und stad vorg.; vorder soe en sall oek nemant van uns allen van den vorg. hertoghen, greven effte synen hulperen zoenen, dedynghen, vorwoerde effte jenigherhande contracten maken, annemen effte slueten bueten den anderen. Dyt vorbund sall duren twyntich jaer nae datum dessen breves naestkomende. Oek soe sall eyn itlick van beyden parten under deser tyd des anderen beste weten und doen in dessen vorscr. puncten ane alte arghelist. In orkunde und tuechnisse der waerheyt hebben wy Thede grevynne unde Sybo ritter vorb. voir uns, unse ervent unde nakomelingen voir unse hoevetlinghe unde vor unse meenheyt, Ede Wynnekens voir uns und unse meenheit, Lubbe Onnekens, Ede Boyngks und Aelke vorg. voir uns und unse meenheit unse ingeseghel witliken doen hangen an dessen breff. Datum anno Domini MoCCCCoLXXIIIo. Desser zedulen synd twe, de ene uth der anderen ghesneden, van enen ghelude.
