| Nummer:oub0935 | Datum:4. Sept. 1474 | Overlevering:Editie | Vindplaats:Ostfriesisches Urkundenbuch, II, S. 34, nr. 935 |
Lubbo Onken zu Knyphausen und Häuptling Onno, die Vormünder der von Alko zu Inhausen hinterlassenen Kinder, verlängern den Waffenstillstand in der Fehde zwischen Hamburg und Lübeck und den Kindern Alko's auf zwei Jahre.
Wij [*] Lubbe Onneken tho Kripense etc. unde Onno, hovetlinge, saliken Alken kinder vormunder tho Innehuzen, bekennen unde betugen opembare in desseme breve vor uns unde allen, den desse sake nu edder tokumftigen mach anrorende sin, so alse denne sulck upslach unde fruntlike bestant in der twistigen saken tuschen den ersamen steden Lubeke unde Hamborg up de eyne, unde Alken Yken to Innehusen seliger dechtenisse van synes broder weghene up de anderen syden, up sunte Michaelis erstkomende exspirert unde uthgheyt, so deshalven de ersame raid to Bremen vortijdes unde ock nu bislitinge hebben ghedaen, hebben wy darumme densulven raide to Bremen to sundergen willen unde leve den vorg. steden Lubeke unde Hamborgh unde den eren dersulven sake halven vor uns Alken kindere unde de jenne, den dat in jeniger wise mede mach andrepende sin, unde dorch uns don unde laten scholen unde willen, alsulcken upslach unde fruntlick bestant noch to twen jaren vorlenget nu up sunte Michaelis dach negestkomende angaende, unde negest na eynander na data desses breves volgende, in sulcker wyse unde manere, dat de erbenomeden van Lubeke unde Hamborg ere borghere, inwonere, koplude, todanige knechte unde alle de se mit rechte vordedingen willen mit personen, linen, schepen unde guderen in unssen unde anderen bewinden unsenthalven tho watere unde to lande sekerlich unde velich scholen mogen komen, wancken unde vorkeren dorch unde wedder dorch unbeschediget, unbelleet, unbesorget, ungetovet unde ungehindert sunder jenigerleie behael unde ane alle nie funde unde argelist, unde desses to mererer bekantnisse unde sekerheit hebben wij Lubbe Onneken etc. unde Onno, hovetlinge, vormunder saligen Alken kindere to Innehusen vorg., unse ingesegele vor uns, den id mede andrepende is, witliken nedenne an dessen breeff gehangen De gegeven is na der bord Christi do me screeff dusent veerhundert unde in deme veer unde soventigesten jare, des sondages na Egidii abbatis.
