| Nummer:oub0937 | Datum:28. Sept. 1474 | Overlevering:Editie | Vindplaats:Ostfriesisches Urkundenbuch, II, S. 35, nr. 937 |
Bürgermeister und Rath von Lübeck und Hamburg bekunden ihrerseits den in Nr. oub0935 von der Gegenpartei bekannt gemachten, von Bremen vermittelten Waffenstillstand.
Wij borgermestere unde radmanne der stede Lubeke unde Hamborch bekennen unde betugen opembare in unde mit desseme breve vor alssweme, dat wy mit den erbaren mannen Lubbe Onneken to Kripenze etc. unde Onne hovetling, saligen Aleken kindere vormunder to Inhusen, een gudlick fruntlick bestand, velicheid unde frede dorch forderinge der ersamen unser frunde, borgermestere unde radmanne der stad Bremen, uppe datum desses breves antostande unde twe jare sunder middel negest volgende to durende angenamet unde beleved hebben, annamen unde beleven de in craft desses breves stede unde vast wol to holdende, so dat Lubbe Onneken unde des vorben. seligen Alleken kindere, denere, kopmanne, undersaten unde alle de jennen, de en to rechte to vordegedingende gebored, mit eren personen, haven unde guderen to water unde to lande, na older loveliken wonheid mogen vorkeren, komende unde wech to reisende, wanne unde wo en dat gelevet unde to donde is, vor uns unde alle de jennen, de umme unsen willen don unde laten willen, unde van rechte scholen sunder geverde unde alle arch. Des tho groter tuchnisse unde sekerheit hebben wy unser stede secrete witliken laten hengen nedden an dessen breeff. Geven unde schreven na Godes bord veerteinhundert ame veer ende soventigesten jare, ame avende sunte Michaelis des hilgen ertzeengels.
