| Nummer:oub1003 | Datum:29. April 1478 | Overlevering:Editie | Vindplaats:Ostfriesisches Urkundenbuch, II, S. 95, nr. 1003 |
Der Häuptling von Jever, Edo Wiemken, verträgt sich mit seinem, Schwager Junker Poppo, Häuptling zu Bargerbuhr etc. wegen des Geschmeides seiner Tante Elmerch.
Ick Ede Wynken, to Jever etc. hovetling, erkenne apenbar in dessen breve vor alsweme, dat ick nu vulmechtich mynes leven broder Iken, leeflicken und gutlicken vorvruntschoppet und vornoeget hebbe vormiddest beyder vrunde ende na ereme rade myt den erberen mynen leven swager juncker Poppen, to Bergum und Pewessum hovetling, umme ansprake, recht und thosaghe, de ick to eme dede und vormende to hebbende; so hebbe ick my derweghenen vulmechtich mynes leven broders oeck alle unser beyder vrunden und erven, boren und ungeboren, wegene mynes leven vaders susters wegen, Elmerch[*] genant, umbhalven eres smydes ene volmechtiger sone und quytscheldynge ghedaen, so de upgenante Poppe, myn swager, my dat gantzliken wedder geantwoordt und overgelevert hefft, so dat ick ene und synen erven des bedancke. Des so en willen edder scollen myn leve broder edder ick oeck unse frunde erven, boren edder ungeboren, nummer na desse tyden to juncheren Poppen erbenomet, sinen vrunden edder erven, boren edder ungeboren, nene rechtelicke ansprake hebben edder tosage doen. Und in desser vorenynge und vordragen weren an und by vor schedesheren de hochgetruwede, ock erbaren und werdigen juncher Here Omken van Dornum und Stedestorpe, Esende und Witmunde, juncher Dido to Bergen, hovetlinges, meyster Haye to Jever und her Dithmer to Waechwert, kerckheren. Desses to ener orkunde der warheyt und merer betuchnisse hebbe ick Ede erbenoemt myn rechte ingesegele witliken hanghen heten beneden to dessen breve. Datum anno Domini duysent vierhundert in deme achte und seventigesten yare, an deme hilgen avende unsses leven Heren hemmelvart.
