| Nummer:oub1049 | Datum:8. Jan. 1481 | Overlevering:Editie | Vindplaats:Ostfriesisches Urkundenbuch, II, S. 134, nr. 1049 |
Vertrag zwischen der Gräfin Theda und ihren Söhnen einerseits und Hero Mauritz zu Dornum andererseits wegen Uebergabe der Burg Friedeburg an die erstere und der Entschädigungen und sonstigen Gerechtsame Hero's.
Tho wetene, dat up den maendach negest nae der hilgen dre konynge daghe int jaer unses HerEn dusent vierhundert unde eyn unde tachtentich eyne fruntliche, entliche und stanthafftighe deghedinghe unde handelinghe ys ghescheen ende ghemaket tuschen der eddelen unde walgebornen vrouwen, vrowen Theden grevynnen, junckheren Ennen unde synen broederen graven in Oestvrieslande, van der enen, unde den duchtigen ende erbern Heren Maurizes, to Dornum unde Vredeborch hovetlingh, by der anderen syden, overmytz welkerer handelinghe ende schedynghe alle unwylle, twydracht unde schelinghe, vorresen van der Vredeborch unde sus van allen anderen saeken, woe de heerkumpstich weren, tuschen beyden parten is guetlich ende vruntlich vornedert unde gruntlichen dalegelacht, soe dat nae dessen daghen deshalven gheen unwylle noch twydracht vordermeer entstaen effte vorrysen en sall moeghen, ende dat in desser nabescrevener manneer unde wyse. Int eerste soe sall de erghenompte Hero Maurizes de Vredeborch myd lande unde lueden, sande, heyde, weyde unde wysche, soe he dat wente to desser tijd hevet in besitte gehat, nu to Paeschachten negestkomende overdregen unde in de hande leveren der eddelen ende walgebornen frowen Theden gravynnen, junckhern Ennen unde synen broederen, graven vorgenant, voir viffdusend golden Rinsgulden; in welkem ghelde viffhundert guldene betaelt synnen und des men nu vort over dren weken erstkomende Heren Maurizes ock sall betalen viffhundert der vorgheroerden guldene unde dairnae nu to Paeschachten, alze de gravynne unde juncker Enne vorscr. de borch entfangen van Heren vorscr. anderhalff dusend Rinsgulden, de to Awrike to entfanghende ende uothtoghevende effte to betalende Heren vorb. effte synen volmechtigen; unde de naestande summen gheldes to betalene to termynen, tijden unde stede, soe de schedesheren dat kennende unde uthspreckende weerden, wanneer de principaelscriffte unde breve van beydenthalven malkem overgheandwordet sall weerden. Id ys oek mede bedeghedinget, dat Hero Maurizes sall beholden to synen besten alle syne erve unde guedere, he dair in der herlicheit tor Vredeborch offte anders gekofft hefft unde eme ghegeven synnen offt anders van broeke angefallen synnen, unde dairto hundert deymede landes, liggende in der Westerhamrike, he to gueden lande hevet ghemaket, dat he uthwysen sall, wanner he de Vredeborch overghift. Dairto sall Hero vorben. beholden de veer meyer, de dair nu tor tijd wonende synnen up dem Ryspele, de eme den tyns van den erve jaerlix sollen gheven, unde sollen vortan tynsvryg wesen van den heren, unde willen se Heren Maurizes vorscr. wes denstes doen, sollen sich de gravynne unde juncker Enno vilgenant nycht an keren, sunder se sollen dat recht soeken tor Vredeborch; ende dairsulffs up den Ryspele mach Hero syn schaep holden to synen willen. Oek is ghedegedinget unde mede sloeten, dat de duchtige Hero Maurizes sall beholden dat reetscap, dat nu tor tijt tor Vredeborch uppe der borch ys van bussen, ketelen, potten unde bedden, dat he mach laten affforen to synen willen myd synen anderen haven unde guederen, behalven teyn bedde myd oren tobehoer, dair de knechte uppe slaepen, de sollen blyven uppe der borch. Dair is oek mede bedeghedinget, dat Hyko Boynghes, syne ervent unde meyster Tyaerd unde sus andere, de ere erve unde gueder in der herlicheyt ligghende hebben, de se nu in besitte hebben effte en myd rechte tobehoren, unbesweret unde unghehindert sollen brueken, unde de eddele vrouwe, junckher Enne ende syne broedere densulfften to eren rechte sullen behulpelick wesen. Oek is mede bedeghedinget, dat de eddel grevynne unde juncker Enno myd synen broederen sullen Hero Maurizes ende synen erven qwyten de hoffstede to Dornum myd dem steenhuse, vorborch, sette unde koelthune, soe dat dar licht, van Ayeld tho Hynthe bueten syne schaden, unde eme daerto behulpelick to wesen eyn hues to bowen myd stene unde anders, soe de schedesheren dat uthzeggende weren, unde weer saeke, dat de eddele vrowe unde grevynne unde juncker Enno myd synen broederen der hoefstedde eme nycht vryen en konde van Ayelde vorscr., soe sollen oer gnade Heren vorscr. dairvoir gheven unde betalen vierhundert Rinsgulden to termynen, so de schedesheren dat kennende unde zeggende weerden. Oek is dairmede bedegedinget unde ghesloten, dat de eddele unde walgeborne vrowe Thede gravynne, juncker Enno voir sick unde syne broedere, sollen vorsegelen voir se unde ore ervent de herlicheit to Dornum, nomptlichen twe kerspele, alze Dornum unde Reddersum, myd oren vorfalle, ghelijck ze dat in besitte hebben gehatt, to ewigen tijden, dair nicht beth up to spreken, unde offte desulven undersaten to Dornum Heren Maurizes, meister Hycke, syn broeder, offte ore ervent wolden dorch de Vredeborch uth effte to hues wes laten foren uthe der heerscap, offt wydenbusch to howene, dat se dat moeghen doen sunder toll effte anders sunder belettinge. Hijrmede sall alle unwille, twidracht unde schelinghe tuschen beyden syden unde delen wesen nedderghelecht, gheslichtet unde ghescheden to ewigen tijden etc. Schedesheren desser vorg. schedingen unde puncten synnen ghewesen de erbern unde duchtigen meyster Hycko, to Dornum hovetling, proest to Emeden, Haye tor Papenborch, proest to Hleer, unde Ubbo, to Upplegewert hovetling, de dyt, soe vorg. ys, allent alsoe hebben ghededinghet unde ghehandelt, unde van beyden parten vorgherort oek alzoe ys belevet unde bevolboerdet. Dessen to orkunde synnen desser zedulen twe, de ene ueth der anderen ghesneden, der eyn itlick part eyne to sich ghenomen hebben, unde des oek to merer ghetuechnisse unde vasticheyt synnen unser Theden gravynnen vorscr. voir uns ende unse sones, unde myn Heren Maurizes vorg. zeghele up desse zedulen ghedrucket. Anno et die quo supra.
