Häuptling Hero Mauriz von Dornum bekundet die vom Bischof von Münster seinen drei Söhnen verliehene Anwartschaft auf die seiner Zeit zur Erledigung kommende Propstei Uttum, unter Angabe der näheren Bedingungen und Mittheilung der dereinst zur Ausführung bestimmten Eidesformel.

Ick Hero Maurisses, to Dornum unde Wytmunde hovetlinck, doe kundt, als de erwerdige hogeborne furste, myn genedige leve here van Munster unde van Bremen, nu umb Godes unde myns verdenstes willen, ick syner genaden unde syner kercken unde gestichte van Munster gedaen hebbe, eyneme van Jenen dreen eeligen sonnen Mauricius, Lutatus unde Gerhardus genompt, welcker van den dreen in tyt, als de provestye Utthum overmytz dode off guetwilliger unde frijer resignacien des pravestes, de de nu under unde in besitte hevet, ledich wert, ime levende unde dan de oldeste van en ys, in deme de geistlich sy off werden wille; wolde de nycht geistlich werden, dan de yenne, de dan nest eme de oldeste ys unde geistlich wil werden; is de ock nycht tor geistlicheyt geneyget, dan de derde unde jungeste van en, indeme he geistlich wille werden, also doch dat erer nycht men eyn tor possessien komen sal, myt derselven provestye unde allen eren tobehoringen verseen unde beleynt hevet na lude syner genaden provisye unde collaciebreve darup besegelt gegeven; so bekenne ick Hero vurscr., dat ick den ergen. niynen genedigen leven heren dartegen wederumme togesacht unde gelovet hebbe, tosegge unde love avermytz denen breve, ick unde myne ervene vogen willen unde sollen, dat de yenne van den ergen. mynen dreen sonnen, de na des ergen. nu aldar levendigen pravestes dode off guetwilliger unde fryer resignacien in maten vurscr. derselvcr provestye possessien unde besit nympt, dan van stunt, sunder sumen, darna des vam officiael is Vreeslandt an eme gesunnen in, synen genaden off synen nakomelingen, bisscope off heren to Munster, synen besegelden juramentbreff to handen senden sal unde ock dat jurament realiter doen sal, na inholde der formen hijrna bescreven:
Ich N., nu tor tijt provest to Utthum, doe kundt, als de erwerdige hogeborne forste unde here, her Hinrick, bisscop to Munster unde administrator der hilliger kerken to Bremen, myn genedige leve here, my myt de provestye van Utthum verseen unde beleynt hevet, na lude syner genaden provisien unde collacien, my darup gegeven, unde ick de nu in possessien unde besitte hebbe, so bekenne ick, dat ick synen genaden, synen nakomelingen unde gestichte van Munster daraff unde derwegene, truwe unde holt sijn sal unde wil, als eyn getruwe man synen heren van rechte schuldich is, syner genaden, synen nakomelingen unde gestichte beste to doende unde er ergeste to keren, na al myner macht, en unde eren officialen unde deynren, als de in myne provestye komen, gutlich to entfangene unde rechte procuracien to doende unde ere rechticheyt to gevene, en ock unde eren officialen gehoersam unde underdanich unde myt raede unde daede behulplich to wesene, unde se unde ere deynre to geleydene unde beschermene to allen tijden na alle myner macht, myt geleyde to halene unde myt geleyde vorder 10 brengene to eren gesynnene, unde ik en sal of en wil my syner genaden, syner nakomelingen offte gestichts herlicheit, rechticheit unde jurisdictien in gyner wijs underwynnen in saken geistlige leyne, echtscap, off saken der sacramenta der hilligen kercken andreppene, noch kercken, kerckhove, geistlige lude eder geistlige sake annemen to richtene off richten to latene, wes my des van older gewonte unde rechte nycht geboerlich en ys, noch my ock yenigerhande ander puncte underwynnene to richtene, de synen genaden off syner geraden nakomelingen unde officiael van gewonte off rechte geboren to richtene; mer mynen genedigen leven heren, synen nakomelingen unde gestichte van Munster by alle erer herlicheit, rechticheit unde jurisdictien to latene, nummermer dartegen te doende, noch laten doen, in gijnerwijs. Ick sal unde wil dan ock synen genaden unde synen nakomelingen umme dat derde jaer daraff des derden jaers bede geven, so vele men derselver provestyen wegene des derden jaers darvor to geven pleget, unde de up dach unde tijt wal betalen, als andere myns heren proveste de plegen uth to gevene. Were ock sake, dat yenige gudere van der vurscr. provestye by mynen off myner vorfaderen tijden gekomen weren, de sal unde wil ick na al myner macht darto weder inwerven, unde der vurscr. provestyen gudere unverkhofft unde unverpandet in guder waringe holden unde de meerren unde beteren na myner macht, dar se recht to hefft. Ich love ock overmytz dessen breve der vurscr. provestye nycht to permuteren, noch ock yenigerleye wijse myner rechticheit unde besittes ick daranne hebbe unde krijge uth myner macht unde handen to latene, dat en sy myt sunderlinx orleve unde consente myns genedigen heren vorscreven off syner nakomelinge. Alle desse articule unde puncte vorgerort sementlich unde itlich besunderen, heb ick N. provest vorscr. by myner truwe unde ere gelovet unde geseckert, unde vort myt mynen upgerichteden vyngeren gestavedes eedes lijffligen over den hilligen gesworen, love, seckere unde swere in krafft desses breves, stede, vast, unverbrocken to holdene, to doende unde to vulforen in aller mate als vurscr. is, unde des nycht to latene, umme yeniger saken willen, de gescheen syn off ommers gescheen mogen; ock heb ich gelovet by den selven eyde, my daraff numtner to laten absolveren, sunder al argelist unde gefeerde. Unde hebbe des to tuge der warheyt mynen segel an dessen breff gehangen, in deme jare etc.
Unde dat deselve myn sonne, de also tor provestyen, possessien unde besit komet synen genaden off synen nakomelingen sulcken juramentbreff besegelt in maten vurscr. senden, unde ock to syner genaden officiaels gesynnen inneholt des juramentzbreffs sulcke loffte unde jurament persoenligen doen sal, heb ick synen genaden unde synen nakomelingen nest mynen vurscr. toseggene by myner truwe unde ere gelovet, unde ock myt mynen upgerichteden vingeren gestavedes eydes ton hilgen gesworen, love, seker unde swere overmytz dessen mynen breve. Desset allet in orkunde myt mynen anhangenden segele besegelt. Gegeven in deme jare unses Heren dusent veerhundert veer unde achtentich, up sunte Kiliani dage.

x

x

Fonds	Ostfriesisches Urkundenbuch, II
Fol.nr.	S. 210
Nr	1134
Olim	Orig. Perg. im K. Staatsarchive zu Münster. Rep. 51c. Nr. 15.
Jaar	1484
Datumcode	Kilian

x

x

Commentaar	Das wohlerhaltene Siegel zeigt einen Wappenschild mit rechtsgewendetem Adler, auf dem Helme dasselbe Wappenbild. S. Hero. Maurici.

x

Materiaal	papier

x

Edities	E. Friedländer, Ostfriesisches Urkundenbuch II (Emden 1881), nr. 1134