| Nummer:oub1251 | Datum:16. Sept. 1489 | Overlevering:Editie | Vindplaats:Ostfriesisches Urkundenbuch, II, S. 299, nr. 1251 |
Der Pfarrer Ulfard Jakobi zu Appingadam bekundet einen zwischen dem .Nompno zu Emden und dem Gerd von Apeldoorn zu Appingadam abgeschlossenen Kaufvertrag über eine Partie Salz unter Mittheilung der näheren Bedingungen, namentlich hinsichtlich der Bezahlung.
Ulphardus Jacobi, curat ten Damme, betughe in dessen openen breve, dat voir my sint ghecomen de voirsenige Loucko van Borssum und Mello Chiackens[*] mijne kerspelslude, und bijkenden mijt vrijen willen, gueden voirberadenen mode, bij salicheyt orer consciencien, dat em witlich, kundich ende wal vordacht is, dat se in den winter latesverleden umtrent voer vastelavent, ten Dumme in des voerscr. Lentken (!)[*] hues, eene vrintschipp hebben ghemaket tusschen Nompnen, borger to Eemden, ende Gheerde van Apeldoren ten Damme, als van soltes wegen, dat de voirscr. Nompno Gheerde hadde verkofft unde do noch bynnen Eemden stand, also dat Gheerd em des anderen naesten daghes na der dedinge der vrentschip solde gheven 20 Aern. golden, und wes Nompnen meer untschorte van der betalinghe des soltes, des geldes solde he dach hebben went to midvasten de naestcomende, men to Palmen wal betaelt to wesen, ende des solde Nompno em Gheerde dat voerscr. solt vrij leveren uth Eemden voir alle ansprake sonder alle ansprake. In orkunde der waerheit hebbe ick Ulphardus curat voirscr. mijn seghel an dat spacium dessen breves ghedrucket. Des wondesdages nae des hilgen cruces dage exaltacionis, in den jaer etc, van neghen en tachtendich.
