| Nummer:oub1381 | Datum:9. Jan. 1494 | Overlevering:Editie | Vindplaats:Ostfriesisches Urkundenbuch, II, S. 403, nr. 1381 |
Häuptling Keno zu Loquart und im Ham überträgt dem Kloster Sielmönken das Vorwerk zu Loquart.
Ick Keno to Loquart ende in den Hamme hoeftlinck, kenne ende tuge in dessen openen besegelden breve vor ... selighe oeldevader Brungher den gestlicken prior ende convente tho Sylmonnik ende horen voerwerck by Loquart quit geschat van all ansprack ende last, unde belovet oer guden, sunderlinge dat vorwerck by Loquart vorscr., to beschermen unde vordedingen tot oren nutten na syner ... yellick te wesen offte beswaren in enighen dinghen, op dat se desto bet den almechtighen Gode mochte dienen ende des recht te gebruken na utwisinghe orer orkunde, des se dat ock erlike bewiset myt myns selige oeldevaders segel beseghelt, den ick gesien ende gelesen heb, dat ich Keno vorg. ende myn rechte erffgenamen, die myn heerlicheit to Loquart na mynen tyden van rechtsweghen sullen gebruken, mochte deylhafftich werden aller guder bede ende werken, die in den voerbenoemde cloester ende voirwerck dagelix schieden ende schien sullen in der ewicheit; so belieff nu devorscr. loffte ende ghiffte myns selighen oeldevaders Brunghers, ende gheve dat voirwerk tho Loquart des cloesters Sylmonicken vorscr. ende oer guden onder myn heerlickeit ganselicke vry ende quit voir my ende myne erven to ewighen tyden van allen scattinghen, die sien, ende gerechticheiden, de my ende myne erffgenamen van rechtswegen toe mochten comen, ende lave voirt ich ende myne erffghenamen se ende oer nakomelingen, rechte besitters des cloesters ende voirwerckes, ende oir guden voirscr, te waren ende te beschermen ten ewyghen tyden by den vorscr. privilegien unde fryheden, helpen vorderen in allen dinghen, wair wy des van rechtesweghen vermoghen sunder al argelist. Hier hebben mede, by, an en over geweest als tugeslude daerto gebeden die ersame priesters her Hermen, prebendaet te Loquaert, unde her Boye, myn capellan. In merder tughenisse der waerheit heb ick myn seghel doen hanghen beneden an dessen breff. In den jaer ons Heeren dusent veerhundert veer ende tneghentich, des donredaghes na der hilger drie coninghe dach.
