| Nummer:oub1453 | Datum:27. Aug. 1495 | Overlevering:Editie | Vindplaats:Ostfriesisches Urkundenbuch, II, S. 465, nr. 1453 |
Die Grafen Edzard und Uko von Ostfriesland bekunden dem Bischof von Münster 10000 Rheinische Goldgulden schuldig zu sein und bestimmen unter Stellung von Bürgschaft den Zahlungsmodus und die Verzugszinsen.
Wy Edezart und Uko gebroder, greven to Oistvreislandth, doen kundt, bekennen und betugen vor uns, unse erven und anerven, dat wy van rechter, kentlicher, wetlicher schult schul- dich syn den erwirdigen hoichgeborne fursten und heren, heren Hinrick van Gots gnaden bisschop tho Munster und der hilgen kercken tho Bremen, unse gnedigen heren, offt syner gnaden nakomelingen thom styfft van Munster, teinedusenth goldene Rinsche golden vor data dusses breves gemunteth und geslagen, gudt van golde und recht swaer genoch ane gewichte, de wy offt unse erven offt anerven den vorgescr. unsen gnedigen heren sollen und wyllen guitlichen und gelofflicken wall doen betalen und leveren up tydt und in maten hirnagescreven: nemptlick nu up sunct Mertens des hilgen bisschops dach allernegestvolgen na gyffte dusses breves, bynnen de stadt Meppen, dersolfften theinedusenth golden gulden viffdusenth tho handen syner gnaden offt syner gnaden nhakomelingen vurscr., offt siner gnaden capittel tho Munster, umbesath, umbekummerth vor idermanne; und de anderen viffdusenth golden Rinsch gulden up sunct Martens doch nu negestkomen over ein jaer, ock tho leveren in maten wu vorscr. is; dat wy so gelofflicken gereddeth und gelaveth hebben in guden truwen by unser ere. Und up dat de stiffte, unse gnedige here bisschop tho Munster und syner gnaden nhakomelingen vurscr. dersolfften betalingen de beth versorgeth und verwarth syn, so bekenne wy Hicko, pravesth tho Emeden, und Hero Mauris, gebrodere van Dornum, Edtzarth tho Pewessum, Ubbo tho Plewerth, Victor Freese und wy borgermeister, scheppenen und raidth der stadth tho Emeden, als rechte principaels sakewolden, so de vurscr. her Edezarth und juncker Uko, unse gnedige leve here und juncker, den vurscr. unsen gnedigen heren van Munster und siner gnaden nakomelingen thom stiffth van Munster schuldich syn theinedusenth golden Rinsch gulden, dat wy darto myth unsen gnedigen leven heren und junckern hebben gelaveth und laven myt samender hanth myt eren gnaden und ere gnaden myt uns sodaene summen, als deselffte theindusennth golden Rinsch gulden, guitlichen und gelofflicken sunder jenigerley behulp ader insage woll tho doen betalen bynnen der stadt Meppen, als dersolfften theindusenth guldene nu up sunct Mertens dach negestkomen viffdusenth, und de anderen viffdusenth gulden up sunct Martins dach negestvolgen over ein jaer, und allent in mathen wo vurscr. tho leveren bynnen Meppen Und off de betalinge der termine alle tidth in mathen wo vurscr. nicht en geschege, so bekenne wy Edezarth und Uko gebroder, greven vorgescr., und wy Hicko pravesth und Hero Mauriss, gebroder van Dornum, Edtzarth tho Pewessum, Ubbo tho Plewerth, Victor Freese, und wy borgermester und scheppen und raidth der stadth tho Emeden vorgescr., semetlich und itlich besunder, vor uns, unse lande und lude, wy nhu hebben off hirnesth krigen mogen, und all unse erven vor all dat dan darnha tho rechter verwilkorder pene alle dage darup gaen und lopen sall und itlichen dach besonder nha dem rechten betaldage vif golden Rinsch gulden, deselffte upgegangen pene gelick und mith der hovetsummen der theindusenth golden woll sollen und willen doen betalen; und hedden wy de ersten viffdusent golden Rinsch golden betalth, und ane betalinge der anderen viffdusenth gulden sumich werden in mathen wo vorscr. is, so sall darup hupen und gaen de helffte der ersten penen itlix dages dat wy ock so verwilkorth hebben, verwilkoren und laven gelick und mith der hovetsummen wall tho betalene sunder behulp offt jenigerley argelisth. En deden wy dusser betalinge nicht wo vorscr. und in jenigen gebreck wo vurscr. sumich werden, dat, wylt Godt, nicht syn en sall, so hebben wy Edezarth und Uko gebroder, gheven vurscr., und wy Hicko pravesth und Hero Mauriss, gebroder van Dornum, Edtzarth Ilse Pewessum, Ubbo tho Plewerth, Victor Frese, und wy borgermeister, scheppen und raidt der stadt tho Emeden vurscr. semptlich und itlich besunder verwilkorth und verwilkoren vur uns, unse erven und anerven, dat men uns, unsen landen und luden, geistlich und wertlick, und alle unsen undersathen, wy nhu hebben off hirnesth krigen mochten, sodane hovetsumme, als vurscr. is, myt aller upgelopenen pene und allen schaden mach affwynnen und manen myth gerichte, geistlich offt wertlich, off sunder gerichte tho water und tho lande, dat ene rechth den andern nicht tho hinderen. Dat wy Hicko pravesth und Hero Mauriss, gebroder van Dornum, Edtzarth tho Pewessum, Ubbo tho Plewerth, Victor Freese, und wy borgermester, scheppen und raidth der stadt tho Emeden vurscr. so mede hebben gewilligeth und gelaveth, und gelaven in krafft dusses breves vor uns, unse erven und all unse anerven, und nyn behulp tegen dussen breff tho soicken off rechtz dartegen tho gebruicken, dat sy pawestlicke offt keyserlicke vrigheiden, wy nhu hebben offt hirnamails erlangen mochten, und dussen breff nergenmede tho wedderleggen noch ledigen, dan mit der betalinge der vorgescr. summen mit der upgelopen pene, dat wy so in sampt und itlich besonder heben gelaveth und gelaven by unser ere in guden truwen sunder allerhande argelisth; und heben darvor mit unsem liffiicken vingeren rechtz gestavedes edes thon hilgen geswaren, dyt alleth wu vurgescr. waer, stede, fasth und gelofflich woll tho holdene und tho doen halden. Und wante dan wy Conraith von Guts gnaden bisschop tho Osenbrugge hiran und aver als vur einen dedingesman gewesth syn, so hebben wy des tho getuge unse segelt under an dussen breff doen hangen, und des tho merer seckerheith und steder holdunge hebben wy Edezarth und Uko gebroder, greven tho Oistvreislanth vurg., unse segell ann dussen breff doen hangen, und wy Hicko pravesth und Hero Mauriss, gebroder van Dornum, Edtzarth tho Pewessum, Ubbo tho Plewerth, Victor Freese, und wy borgermeister, scheppen und raidth der stadt tho Emeden ock unser samenth segelte mede by unser gnedigen heren unde junckeren segelen hiran doen hangen. Gegeven in dem jaer unses Heren dusenth verhunderth viff und negentich, am donredage nha sunte Bartholomeus dach, des hilgen apostels.
Scriptum et subscriptum per me Ludolphum Kottynck, sacra apostolica autoritate notarimn, et concordat cum suo vero originali, quod ego attestor mea manu propria.
Scriptum et subscriptum per me Ludolphum Kottynck, sacra apostolica autoritate notarimn, et concordat cum suo vero originali, quod ego attestor mea manu propria.
