| Nummer:oub1460 | Datum:31. Okt. 1495 | Overlevering:Editie | Vindplaats:Ostfriesisches Urkundenbuch, II, S. 472, nr. 1460 |
Bürgermeister und Rath von Groningen verbürgen sich für die pünktliche Zurückzahlung der dreitausend Rheinischen Gulden, welche die Grafen Edzard und Uko von Ostfriesland von den Kirchen zum heiligen Geiste und S. Georg zu Hamburg geliehen haben.
Wy borgermeisteren ende raet in Groningen bekennen ende betugen openbaer in dessen breve vor ons, onse nakomelinge ende alswen, dat wy myt eendrachtigen rade ende ganser vulboert togesecht ende gelovet hebben, toseggen en loven jegenwoerdigen den ersamen, vorsichtigen heren borgermeisteren ende raet der stadt Hamborch, to behoeff der godeshuuseren, alse des hilligen Ghieste bynnen ende sunte Juriens buten vor Hamborch belegen, dat wy daervoer guet wesen ende daervor staen wyllen, dat de edlen wallgebornen junckheren Edzaert ende Uko gebroderen, greven in Ostvrieslant, en wi[*] up Martini naestkomende voert over een jaer, noemtliken in den sesendenegentichsten jaer der boert ons Heren, to gansen genoge gelden ende betalen sollen bynnen Hamborch driedusent gude vullwichtige Rynssgulden, als den vorg. greven de vorstenderen der vorg. godeshuuseren nu in guden, rede, overgetelde, vullwichtigen golde gelient, ende den erbaeren Arndt Scroder to Emeden ende Ubben Goltsmyt to Norden averantwordet hebben. Ende wiert, dat an der betalinge soe vorscr. is jenige sumenisse en to geringe geschege, des God nyet en wylle, ende de vorg. vorstenderen der vorg. godeshuuseren von sulcker trage betalinge wegen jenigen scaden leden offte derhalven onkost deden, sullen en de[*] vorg. greven ende oeren erven deger ende all wederleggen, ende de van Hamborch sullen vulle macht hebben, derwegen ons, onss borgeren ende oeren guderen, waer se des mogen bekomen, up to haldende ende to tovende, soelange ende want to der tydt, dat de vorstenderen der vorg. godeshuuseren sodane driedusent Rynsgulden myt allen onkosten ende scaden derhalven geleden to ganser noge bynnen Hamborch synt ontrichtet ende betalt, want wy von den greven vorg. derhalven nochafftige versekeringe hebben; alle vorg. stucken ende artikell in dessen breve begrepen samentlick und besonderen loven wy borgermeisteren ende raet to Groningen vorg. vor ons ende onse nakomelinge den ersamen rade der stadt Hamborch tot behoeff der vorg. godeshuuseren stede, vast ende onverbroken in guden trouwen, eren ende loven wall to holdende ende guet to wesen vor alle gebreck, dat em sodane vorg. dryer dusent gulden halven mach wedervaren sunder alle argelist; ende des to groter tuchnisse ende meere verwaringe hebben wy onse stadt segell vor ons ende onss nakomelinge witliken an dessen brieff heten hangen. De ghegeven ende gescreven is na der boert Christi ons Heren vierteynhondert ende vyffendetnegenstichsten jaer, op aller Goles hilligen avent.
