| Nummer:oub1461 | Datum:31. Okt. 1495 | Overlevering:Editie | Vindplaats:Ostfriesisches Urkundenbuch, II, S. 473, nr. 1461 |
Die Grafen Edzard und Uko von Ostfriesland verbürgen sich mit einigen Häuptlingen für die pünktliche Zurückzahlung der von der Stadt Hamburg an die Stadt Groningen in ihrem Interesse dargeliehenen Summe von 3000 Rheinischen Gulden.
Wy Edzart unde Uko gebroedern, graeve to Oestfreesslant, bekennen unde betuygen dessen breve apenbaer voer uns, unse erven unde overerven, dat wy den ersamen borgermestern unde raedt der stadt Gronyngen hebben gelavet unde toegesecht, laven unde toeseggen tegenwoerdich in crafft desses breves oere hande schaedeloess to holden voer soedaene loffte unde borchtuchte, alse de erssame raedt der stadt Gronyngen vorscr. doer unse begeerte unde uns to wille gedaen hebben an den ersamen hern borgermestern unde raedt der stadt Hamborch voer eyne secker somma van pennyngen, naemptlyck dreeduysent gude vulwychtyge Rynsche gulden, de wy Edzart unde Uko vurscr. van den ersamen heren borgermestern unde raedt der stadt Hamborch ontfangen hebben, also dat wy de vurscr. somma van pennyngen guetliken, deger unde all wedder betalen sullen den vurscr. borgermestern unde raede der stadt Hamborch bynnen oere stadt sunder oren unkosten unde schaeden up Martini naestkomende aver eyn jaer, nemptlyck in den jaere nae der boerth Cristi duysent veerhundert in den sess unde negentigesten jaere daernae naestfolgende, mit soedaene vorworden, offt de betalinge der vurscr. pennyngen neet en geschege als vurscr. is, also dat de von Gronyngen, oere borger, ingeseten unde undersaeten oeres verbundes, ennich van den, daerby in last, hynder unde schaeden van quemen, dat Gott verhoede, den sullen unde laven wy voer uns unde unse erven unde overerven em alyngk unde all mit den principaellgelde guetlichen wedder up to richten, unde all schaedeloess van to holden to oeren sempeln seggen unde woerden, sunder ennygen edt offt bewyss daervan to doende. Unde offte des allen so vurscr. in neet en geschege unde geholden worde, so sullen unde moghen de ersame raedt unde stadt Gronyngen vurscr. holden unde manen up uns unde (unse)[*] lande unde luyde, waer sie des bekomen moghen in ennyghen heren lande, steden offt plaetzen, sie mit lyve unde gude to besetten unde to beletten, sonder ennyge wedersprake ennyges rechten, geestlykes offt wartliches, syck schaedeloess van to makende; daerntegens wy, unse lande unde luyde ghene vryheyden, marckeden, privilegien noch geleyden in geneten noch entegens bruyken sollen. finde to meerer sekerheyt hebben wy Edzart unde Uko vorscr. bewilliget de erbern, duchtigen unde hoechgeleerden mester Hycken, doctor ende provest van Embden, mit junckern Edzart, hovetling to Pewessum, unde den erbern Haye Rypperden, [*] provest unde hovetling to Fermessum, mede van desse loeffte unde borchtuchte to staende van unser wegen tor hant den ersamen borgermestern unde raede der stadt Gronyngen vorscr., dat de betalonge der vurscr, somma van pennyngen alynk unde all weder gerichtet sall werden bynnen der stadt Hamborch up dach unde tyt vurscr., mit allen unkosten unde schaeden, de alssdan darup gegaen mochten wesen. Daer wy Hycke, Edzart unde Haye so samptlyken unde elck voer all, voer uns ende unsen erffgenamen so guetlicken angenommen hebben, unde in crafft desses breves annemen, den eddelen walgeboern heren Edzerde unde Uko, greven vurscr., to dancke ende to willen in unde voer de borchtuchte t staende in allen wysen unde maneern alse vurscr. is, daervoer wy mede alle unse guder tot eynen underpande setten den ersamen raede der stadt Gronyngen vurscr. samptlyke, unde elck voer alle, al dyngk also to holden, alse vurscr. is. Offte des also nicht en schege, daer Gott voer sy, sollen unde moghen alssdan de ersame raedt der stadt Gronyngen dat holden, soken, mannen unde bekomen aver desulve unse guder unde van eynen ytlycken besundern em all schadeloess daervan to maken mit wat rechte offte anders wo unde in wat maneern em des best belevet unde even komen sall moghen sonder unser enyger wedderspraeke offt behulpe geestlykes offt wartlykes offte anders enyge hulpreede, uns daerntegens deenen mochten, to gebruyken offte to geneeten. Des so laven wy Hycko, Edzart unde Haye vurscr. alle puncten ende artickeln so vurscr. syndt mit malkandern ut to draegen, unde elck den andern schaedeloess daervan to holdende, des daeraff in last offt schaeden qwemen sunder alle argelist. To meerer oerkunde der waerheyt hebben wy Hycko, Edzardt unde Haye unse ingesegele wyttelyken doen hangen beneden an dessen breeff. Gegeven nae der boerth Cristi unses Heren duysent veerhundert vyff unde negentich, am avende alle Gots hylghen.
