| Nummer:oub1467 | Datum:25. Nov. 1495 | Overlevering:Editie | Vindplaats:Ostfriesisches Urkundenbuch, II, S. 477, nr. 1467 |
Bischof Heinrich von Münster quittirt den Grafen von Ostfriesland über 5000 Gulden, als erste Rate der vertragsmässig zu zahlenden 10000 Rheinischen Gulden, und behält sich vor, da die Zahlung fast nur in Friesischen nicht vollwichtigen Gulden geleistet ist, die Differenz von ihnen einzuziehen.
Wy Hinrick, van Godes genaden bisscop to Munster unde administrator der hilligen kercken to Bremen, doen kundt, als wy vor uns unde unse nakomelinge myt sampt den erberen unsen leven andechtigen domdeckene unde capittele unser kercken to Munster, den edelen heren Edtzarde, greven to Oestvreschlandt, unde zynen broder Uken, eyne recognicien versegelt heben, [*] vermeldende, wy van on theyndusent goldene Rinsche guldene entfangen sollen heben, welckerer guldene men up sunte Merten nestvergangen vyffdusent solde hebben betaelt, unde de anderen vyffdusent boren sall up sunte Merten nestkomene na lude des schultbreves darvan spreckende; so bekennen wy, dat wy van den ergenanten graves unde zynen broder up baden datum desser quytancien der theindusent guldene vyffdusent des eyrsten verschennenen termyns gebort heben; unde als dat dan vaste alle Vreesche guldene zyn unde ock er gewichte nycht all en heben unde de verdracht helt up gude sware vulwichtige goldene Rinsche guldene, is bekallet, off uns de gulden all off welik uthgeschotten worden unde men nycht vor gude vulwichtige goldene guldene vor vulbetalinge van uns entfangen wolde, dar wy de uthbeydene werden, dat dan de vurscr. greven unde zyn broder wat der gulden so uthgeschotten werden in unser stadt Meppen upn donredach na sunte Pauli primi heremiten dage schyrstkomene[*] weder to sick nemen sollen, unde uns dan vort darvor unde in de stede van stunt unde uff densulften dach andere gude sware vulwichtige goldene guldene geven unde betalen sollen, velck unse reede unsen pravest to Emeden, mester Hicken, eder Hero Maurissen, gebroderen van Dornum, on beyden eder erer eyn, under desser tyt vurscr. den tall der wederachteden guldene sollen schryven doen bynnen de stadt Emeden. unde off de vorgemelten greve unde zyn broder up de vurscr. tyt in unse stadt Meppen nycht en schickeden unde sodane wandelinge vorg. nycht en deden, so mogen unde sollen wy uns holden na lude unde inneholde unser sigele unde breve in mathen unde gelyck wy nycht betaelt en weren. Unde des in oirkunde heben wy unse segell hyr under an dussen breeff doen hangen. In dem jure dusent veerhundert vyff unde negentich, up sunte Katherinen der hilligen junferen dage.
