| Nummer:oub1476 | Datum:14. Jan. 1496 | Overlevering:Editie | Vindplaats:Ostfriesisches Urkundenbuch, II, S. 491, nr. 1476 |
Die Bevollmächtigten der Grafen von Ostfriesland bekunden, dass die Quittung des Bischofs von Münster über die von den Grafen gezahlten 10000 Rheinischen Gulden (Nr. oub1452) der noch ausstehenden zweiten Zahlung von 5000 Gulden nicht präjudiciren solle.
Wy Hero Maurissen van Dornum, mester Diderick Valcke, mester Matheus Nyggekamer, Sybo Hoytken, vaget upn Oerde, dose kundt openbaer als vulmechtigen der edelen heren Edtzardes, greven to Oestvreschlandt, unde zynes broders juncker Uken, unser genedigen heren unde junckeren, so als de hogeboren furste unse genedige here van Munster etc. eyne recognicien versegelt hefft, vermeldende zyne genade van den vurscr. heren Edtzarde unde zynen broder juncker Uken theyndusent goldene Rinsche goldene entfangen solle heben, welckerer guldene men up sunte Merten nestvergangen vyffdusent solde betaalt heben, unde de anderen vyffdusent goldene Rinsche goldene boren sall up sunte Merten nestkomende na lude des schultbreves darvan spreckende, als men schryfft dusent veerhundert sess unde negentich, unde huden up dach datum desses breves de eyrsten verschennene vyffdusent guldene betaelt unde de anderen vyffdusent goldene Rinsche guldene nu noch achterstedich unde unbetaelt zyn, so bekennen wy, dat sodane recognicie van unsen genedigen heren van Munster gegeven als vurser., unhynderlick to den anderen unde lesten vyffdusent goldenen Rinschen guldenen zyn unde wesen sall sunder argelist; unde des in oirkunde der waerheyt heb ick Hero Mauriss vurscr. myn signet vor my unde vor de vilgenanten geschickeden frunde des edelen mynen heren, greven toe Oestvreschlandt vurscr., umme gebreck der anderen, witlicken an dessen breeff gehangen. Dar mede, an unde over weren Dedeke Schade unde zyn sonne Wilbrandt Schade. Gegeven in deme jare unses Heren dusent veerhundert sess unde negentich, up Felicis in Pincis des hilligen confessoris dage.
