| Nummer:oub1642 | Datum:Leeuwarden, 8. Okt. 1499 | Overlevering:Editie | Vindplaats:Ostfriesisches Urkundenbuch, II, S. 618, nr. 1642 |
Herzog Albrecht von Sachsen u. s. w. verpfändet dem Grafen Edzard von Ostfriesland für die im Kriegszuge gegen Groningen aufgewendeten Kosten von 16000 Goldgulden das Oldamt mit den Schlössern Oterdum und Pekelburg und dem Dorfe Bellingwolde.
Wir Albrecht, von Gottes gnaden hertzog zcu Sachsen, landgraf in Doringen und marggraffe zcu Meissen, Romischer kuniglicher majestat und des heiligen reichs ewiger gubernator in Frieslandt, bekennen mit diesem unserm brieve fur uns, unser erben und nachkummen, nachdem der edell und wolgeboren unser besunder frundt, her Edzart, graffe zcu Oistfriesslandt, uns in den kriegsleuffen, so wir in vorgangner zeit gegen der stadt von Grunyngen und iren helffen gehabt und noch haben, mit seiner person gedienet hat mit etlicher zall von kriegsleuten und seyner eygen undersassen, auss welichen ursachen und diensten wir dem vorgenanten heren Edzart schuldig worden sein ein mergkliche summa gelts, dairumb wir genaygt sein den voirgescriben heren Edzart zu vergnugen der obgenanten suma, die er in denselben diensten fur uns vorlegt und ausgeben hat: Demnach vorscreiben wir fur uns, unser erben und nachkumen, dem obgenanten heren Edzart, seinen erben und nachkumen, auch auss sunderlichen gnaden, so wir zcu ime tragen, auss rechter wissenhaitt und zeitigem ratt unser rate, so die zeit bey uns gewesen sein, in crafft disses briefs der heerlichait, genant das Altampt, mit den zweyen sclossen Otterdam und Peckelburg, so die von Grunyngen besessen und gebraucht haben, nichts aussgescheiden, die wir hiemit zu seinen handen stellen mit allen dorffern, sclossen, auch das dorff Bellingwolt, auch alle renthen und gulten aufheben die darzu gehoren, laut unser commission, wie wir die selbest hetten mugen gebrauchen, fur die summa benantlich sechzehentausent gulden an golde. Weliche voirgescriben heerlichait genant das Altampt mit allen sclossen dorffern und das dorff Bellingwolt, nutzungen und renthen darzcu gehorende der obgenant her Edzart, sein erben und nachkumen, gebrauchen, genyessen und besitzen sollen, gleych und in allermaissen als ire eygen gutter, accisen und ander zimlich aufsatzung tun, wie wir solichs in andern unsern landen laut Romischer kuniglicher commission tun und tun mochten, biss zur zeit und also lanng, das wir, unser erben und nachkumen oder ander die von wegen der Romischen kuniglichen majestat und des heiligen reichs nach laut und inhallt der kuniglichen commissien, die wir ueber die Friessischen land haben, auch unser, unser erben und nachkumen claren consent und vorwilligunge geschickt und geordeneyrt werden, dem voirgeschriben herrn Edzart oder seinen erben und nachkumen die obgenanten summa von sechzehentausent goltgulden und dairzu die costen, so er der scloss halben oder sunst tun wurde und sych in erber rechnung erfinden wirdt, bezalt sullen haben. Welches wir, unser erben und nachkummen oder ander wie obengemelt darzu geordinert von wegen des heyligen reichs, sullen mogen tun zu allen zeitten und also offt, so uns das gut dungken und gevallen wyll; wol zcu versteen: zcu welicher zeit, es sey aber kurtz oder lanng, der selbig her Edzart, sein erben und nachkumen, der vorgescriben sechzehentausent goltgulden und die costen wie vorgedacht in der form und weise wie oben verclart auff einmaill und also bar bezalt und vergnuget wirt, alsdann sollen sy gehalten und schuldig sein, das vorgenant Altampt, wie er die emphangen und eingenomen hat, mit aller seiner zcugehorung in unser oder unser erben und nachkummen handen oder derjhenen, die alsdan von wegen des heiligen reichs wie oben steet und net anders darzcu geordinert werden, widerumb einantwurden und zcustellen, und alsdan ir handen darvon absclahen und sych sunder widerhede, exception oder behellf, wie das erdacht mocht werden, sich des nicht mehr unterwinten. Gebietten darauf als gubernator Romischer koniglicher majestat und des heiligen reichs allen gaistlichen und werntlichen einwonern und underthanen der voirgescriben herscafft des Altenampts und des dorfs Bellingwolt genant, das sy dem gemelten heren Edzart gehorsam, eyde, pflycht und gelubde tun sollen, wie sich das gehort, und sich gantzlich nach im richten und halten in massen und nicht anders, wie wir ime das hierinne vorscriben haben, alles getrewlich und ungeverlich. Zcu urkundt haben wir unser ingesiegel unden an dissen brieff wissentlich thun hengken, der gegeben ist zcu Leowarten, auf den achten tag des manets Octobris, anno etc, in dem neun und neuntzigisten jair.
