| Nummer:oub1645 | Datum:8. Nov. 1499 | Overlevering:Editie | Vindplaats:Ostfriesisches Urkundenbuch, II, S. 621, nr. 1645 |
Heirathsvertrag zwischen dem Enkel des Bolardus, Abel, und der Grete, Tochter des Heinrich und der Trude Lefferdes, und Regulirung der event. Erbrechte.
Ick Hermannus Wessel, kerchere to Emeden etc., unde Johannes Huesman, lantrichter der gravescap Oestvreesland, bekennen unde betughen myt dessen unsen apenen beseghelden breve vor alsweme, dat ther eren Godes by beydenthalve vrunde rast ene[*] hijlick ghededynghet unde besloten ys tuschen des ersamen Bolardus sones kynt, Abelen ghenoemt, van der enen syd, unde Truden Leffardes dochter, Greten ghenoemt, salighen Hinrick Leffardes dochter, in wyse unde maneer nabescreven: also dat Bolardus ghift Abelen mede to bruetschat anderhalffhundert grase landes, de he em uthwysen sal voer de werschup, de Abel unde Grete bruken solen na eren willen so vro de werscup gheholden ys, unde wan Bolardus unde syne huesfrowe doet synnen, so moghen de ander broders dar so vele jeghen nemen, unde des sal men Abelen ghene upghenomen rente anrekenen; wes he van synem lande upghenomen heft sal he tovoren affbeholden. Oeck heft Bolardus datsulfte hues unde warff, dar he nu inne woent, medegheven Abelen unde Greten, dat se myt eme solen bewonen unde to ewigen tyden solen beholden myt der koken unde halven ghanghe unde de putte unde dat ruem to brukende to beyden huseren. Oeck sal em Bolardus dat hues myt deme warve vry leveren vor alle ansprake, de Abelen moder darup hebben mach nu ofte in thokomen tyden, unde ock vor syne ander brodere unde sustere vor de werschup; unde wan Bolardus unde Elske doet synnen, so scolen de ander kynder van deme huese hebben vyftehalffhundert golden Rynsche gulden, welkeer vyftehalffhundert Rynsche gulden solen staen unde untfanghen weerden voer eens brodersdeel van des huses wegen, dat Abel ghegheven ys, unde dat ander broderdeel daerkeghen sal wesen dat hues, daet salighe Abel unde Ewese plegen to bewonen, myt den halven ganghe unde rume to beyden huseren to brukende als vorscreven ys; unde weme dat olde hues to dele valt, de sal hebben den warff buten Emeden, den Bolardus kofte van Hinrick van Bulderen; ende van alle den guderen, wan eyn ytlyck heft anderhalffhundert grase landes unde twyntich Rynsche gulden renthe unde sodaen anpart in huseren, werven unde ghelde, alse tovoren gheroert ys, wes daer dan meer ys, solen de dre broders tohope delen. Oeck ghift Bolardus Abelen twyntich golden Rynsche gulden renthe, de he em ock uthwysen sal vor der werscup, unde na der werscup na synen willen bruken, unde desulften renthe mach men myt hundert golden gulden affkopen; vorder wes Bolardus unde syn huesfrowe by erem leevende tosamen wynnen unde werven, sal Abel synen anpart mede an hebben ghelijck de ander broder, unde wes eme nu medelovet ys, so vele mogen dan syne brodere daerjeghen uthnemen, wan Bolardus unde Elseke in God vorstorven synt. Item Abel unde Grete scolen myt Bolardus unde Elseken int hues wonen, unde Bolardus unde Elseke scolen dat hues upholden unde solen Abelen unde Greten de kost besorgen, unde isset, dat se syck myt malckander nicht konen vordraghen, so solen Abel unde Grete dat hues nedden hebben unde de koeken, unde Bolardus unde Elseke de twe kameren boven, unde solen allykewal de boene unde dat hues alle veer tosamende bruken. Item Trude Leffardes heft Greten, orer dochter, mede ghelovet dardehalff styghe grase landes myn een gras, unde dardehalff hundert golden Rynsche gulden an reden ghelde, to betalen so vro also de werscup gheholden ys, ses golden Rynsche gulden renthe bynnen Emeden, hundert golden gulden in sulver unde golde unde gesmyde to orem lyve, unde eyn bedde myt syn thobehoer, ende sal oer dochter na orem behoer wal kleden; hyrmede sal Grete affghescheiden wesen, so dat se, noch nemant van orentweghen, tot ewigen tyden beth sal spreken, se noch ere erven, up Truden orer moder van eres vaders saligen Hinrickes naghelaten guder weghen. Ock ofte Trude syck wedder int echtschap verseghe unde meer kynder teelde, so sal se na orem dode Greten ore dochter mede beerven na anpant unde erkantenisse des lantrechtes, jodoch sal se den willen unde macht hebben myt eren gude, dat se nu heft off by erem levende werven mach, daermede to doen unde to laten, to laten unde to doen na eren vryen willen, to vorghevende wen se wil, nemandes ofte nicht uthghescheyden. Alle desse vorscreven articule unde puncten hebben Bolardus als eyn vormunder syns soens kynt Abele, unde Grete vorscreven sende Trude vorghenomed sulffs anghenomen, myt hande unde myt munde ghelavet stede und vast to holden sunder arghelist. Ock ofte de junghen Abel unde Grete entwestorven sunder lyveserven, so sal de ene van des anderen guet, wo dan langhest levet, vorbetert wesen hundert golden Rynsche gulden, hebben ende beholden ewelick unde erfflick, unde alle guder solen voert wedder up de rechten erven komen. Hijr synnen by, an unde over ghewesen de erbaren mans her Frederick, prebendate der kerkere to Emeden, Hinrick Kremer unde Peter Hilliken, borghers daersulvest, also tugheslude hijrto gheropen unde ghebeden. To merer orkunde der waerheit so hebben wy mester Hermen ende Johannes Huesman ergenant unser beyder ingheseghel durch bede willen Bolardi, Trudens, Abels unde Gretens vorscreven benedden to dusseme breve ghehanghen. Na der boert Christi veerteynhundert, daerna inne neghen unde neghentichsten yaer, ame vrydage voer sunte Marten, des hillighen biscops unde confessoers.
