| Nummer:oub1665 | Datum:Wissel, 12. Okt. 1500 | Overlevering:Editie | Vindplaats:Ostfriesisches Urkundenbuch, II, S. 636, nr. 1665 |
Herzog Heinrich von Sachsen u. s. w. bekundet, von den Grafen Edzard und Uko von Ostfriesland 3000 Goldgulden entliehen zu haben, und verspricht binnen 14 Tagen sichere Kaufleute. als Bürgen zu setzen und auf Ostern das Geld zurückzuzahlen.
Wir Heinrich, von Gots gnaden herzcog zcu Sachssen, landgraffe in Doringen und marggraffe zcu Meyssen etc., bekennen fur uns, unsser erben und nachkummen, das wir rechter und redlicher schuld schuldig sein den edeln unsern besundern lieben und getreuen, herren Edezardt und herren Hugo, graffen zcu Ostfriesslandt, iren erben, die summa benantlich dreythausend gulden an golde, welche summa wir geloben und gereden bey unseren waren furstlichen worten und gutem gelauben fur uns, unser erben und nachkummen, gemelten graffen und iren erben wel und tochtigklich zcu bezcalen auff nachstkunfftig Pascatag zcu Anndtorff mit gutem golde, das da zcu Anndtorff genge und gebe ist, an allen sein costen und schaden; und verbynden uns auch bynnen vierzehen tagen nach datum ditzs brieffs inen sunderlich des mit gewissen kauffleuten zcu versichern, die inen das geloben sullen auf soliche zceyt gewisslich und ane iren schaden zcu bezcalen, alles getreulich und ungeferlich. Und zcu steter haldunge und beweysung haben wir unsser furstlich insigel unden an dysen brieff thun hengken, der gegeben ist zcu Wyssel, auf Montag den zcwelfften tag vom October, anno Domini im funffczehenhundredisten jare.
