| Nummer:oub1753 | Datum:8. Dez. 1409 | Overlevering:Editie | Vindplaats:Ostfriesisches Urkundenbuch, II, S. 711, nr. 1753 |
Schiedsspruch der Rathssendeboten der Städte Hamburg und Lüneburg in den Streitigkeiten zwischen Keno tom Brok einerseits, und Hisko von Emden, Enno von Norden und Haro Idzerdes andererseits.
Dit is de schedinge unde recht, de wi Menhard Buxtehude unde Hinrik Viscule, borgermestere van Hamborch unde Luneborch, van unser rade weghen segghen unde overgheven twisschen Kenen, Hisken unde Ennen und eren vrunden, alse se bi den vorscreven raden bleven syn, also wi rechters nicht bevraghen konnen und ok zulven rechters nicht en weten
1. Int erste alze Hysske in synem antworde to Kenes claghe roeret, dat Kene in dem banne sy unde darumme Kene nicht antworden dorve van rechte; segghe wi vor recht: al were Kene in deme banne und Hysske dat mit rechte bewiset hedde, doch nadem dat Hyske zik vorwillekort heft, dat he antworden wille, so schal he Kenen antworden to syner claghe.
2. Item alse Kene van Broke claghet uppe Hyszken van Emeden, uppe Ennen van Norden und uppe ere vrund, tom ersten alse he schrifft, dat Hyszke vorscreven sik vorplichted hedde mit breven und mit loften, den zylen unde den dyken to Valren nenerleyen schaden to donde etc., unde dat hirenboven Hyszke und syne vrunt hebben de vorscreven zyle inghebrand, dar Kenen ende den zynen unvorwinlik schade an gheschen sy, de hogher lope, den ene tunne goldes edder twe etc., unde alse Hyszke darto antwerdet, dat Kene vorscreven sete mit eme und synen vrunden in ener geswornen beseghelden sone, und sete mit em ok in enem vrede, den de stede mit erer beider willen gedeghedinget hedden etc., hirenboven hebbe Kene upghetoghen de zile to Osterhusen, und he und syne vrund hebben ok bynnen dersulven sone eme afgewunnen dat hus to Dethern und dat hus to Yderhove etc., unde umme desser vorscreven ghewelde und unrechtes willen hebbe he laten bernen den zyl Valren umme rechter notwere willen sines lives landes und gudes; hirup denket uns recht hedde Hiszke und syne vrund in der hantafftigen daet Kenen und synen helpern icht gedan darover, dat se de zile to Osterhusen uptoghen edder dat hus to Dethern edder Yderhove wunnen, alse dat in Hyszken antworde steit, wat se Kenen unde den synen darover gedan hedden, dat mochte me vor notwere rekenen; heft aver Hyszke unde de syne na der tyd Kenen und den synen den schaden ghedan alse syn claghe inneholt, unvorvolghet und unvorclaghed na rechte, so is id wedderwrake und nen notwere; und en heft Hiszke dat nicht utghedreghen, alse recht is, und en heft he Kenen na der sone nicht entsecht unde to den eren vorward, so schal he dorch recht de sonebrake und vredebrake vorboten unde den schaden ghelden na rechte.
3. Uppe den anderen artickel, alse Kene schrifft, Enne van Norden hebbe eme afghewunnen sin slot und stede to Lerlte an ener zekeren orveide boven loffte und ede etc., unde alse Ennen antworde darenteghen inneholt, dat he der loffnisse und orveide nicht en bekenne; hirup segghe wi vor recht: Kene mach Ennen des beth overtughen na rechte, den he eme des mit syner unschult entghan moghe, unde is de sone edder orveide vor gherichte schein, so mach he de tughen mit deme richtere und mit twen schepenen; is id aver ane gerichte gheschein, so mot he dat tughen zulf sovede vullenkomener lude an ereme rechte; unde betughet Kene de sone und orveide, alse vorscreven is, so schal Enne durch recht eme dat hus wedder antworden, na dem dat he bekand, dat he hebbe ghehulpen eme dat affghewunnen, und schal eme den schaden ghelden na rechte; wenne alse Enne schrifft, Kene hebbe ene vordreven und eme syne slot affgewunnen binnen magheschopp etc., dat scholde he durch recht vorvolghed und vorclaghet hebben und syk to den eren vorwart hebben, eer den he Kenen jenighen schaden gedan hedde; wor des nicht geschein is, dar mot he dat na rechte vorboten, alse vorgeroret is, umme der orveide unde sone willen.
4. Item alse Kene claghet umme schaden, de synen godeshusen, herben und hilligen gheschen sy van Hiszken unde synen vrunden, dar Hiszke to antwordet, dat he van rechtes weghene dar nicht schuldich to sy to antwerdende etc.; segghe wi vor recht: an wat kerken, der Kene de lenware heft edder de em van kuntschop des landes edder van rechtes weghene bort to vordegedingende, jenich schade gheschen is van Hyszken edder den synen, den schaden mach Kene vordern und esschen to der kerken behoef; aver umme overvangh, smaheit und unhorsam in Hyszke Kenen nenes antwerdendes plichtich.
5. Item uppe ansprake unde claghe Hiszken provestes to Emede und uppe antwerde Kenes van dem Broke: tom ersten alse he ene ansprikt, dat in deme jare unses Heren 1407, ipso die Michahelis (29. September), he schal gerovet hebben dat kerspel to Yderhove in Overledigher. lande etc.; item als, he ene ansprikt, dat in demezulven jare, alse in sunte Sebastianes daghe (20. Januar), he lach vor der borch to Yderhove etc.; item uppe datsulve jar, dat he scholde gherovet unde gebrand hebben Wolkmedehusen und Hallingmore etc.; item in deme jare 1408, dat he schal gewunnen hebben Detherde etc.; item dat he deszulven jares schal gestortet hebben to Nymramore twe borghe etc.; alse Kene to allen vorscreven artickelen mit enerne antwerde antwordet, dat de vorsonet syn; spreke wi vor recht: kan Kene des vullenkomen und de sone bewisen, alse recht und alse hir vorgerort is uppe Kenen claghe und Ennen antworde, so en is he dar vorder nichtes umme plichtich.
6. Item alse Hiszke claghet van schaden, de eme ghescheen is van Kenen to Rawida, item to Andorpe, item to Bokemore, item to Volsneborch, item to Kollingehorst, item to Pophteshusen; item in des bisschoppes frede van Munster, dat Fock Uken schal gerovet hebben 6 perde to Bokemore; item int jar unses Heren 1409 uppe sunte Gregories dach (12. März), dat Focke Uken schal gherovet hebben dat kerspel to Yderhove; item int jar 1409, dat he schal schaden ghedan hebben, to Nesse etc.; item dat he schal inghegraven hebben dat olde zildeip to Westerhusen; item dat syne vrund den Emederen affgheslaghen hebben 6 man; item dat Fock Uken schal gheschattet hebben van den Emederen 800 ghuldene, unde twe vanghene man noch in deme stocke hebbe, unde ene geladene schuten, also gud alse 400 ghuldene, ghenomen hebbe; item umme schaden, den he schal gedan hebben in Westerlande by der Emeze, alse 2 par ossen, 5 koy, 4 stighe schapp etc.; alse Kene to allen neghest vorscrevenen artikelen mit eneme antwerde antwordet, dat de gheschen sin in opener veyde, na der tyd, dat de zil to Valren inghebrand und Lerlte gewunnen wart; spreke wi vor recht: kan Kene dat bewisen, alse recht is, dat de stucke alle in veyde gheschen syn, so en darf he dar nicht to antwerden; were ok, dat dat vor Emeden zunderken affghesecht were, so ne is he dar vurder nenes antwordendes umme plichtich, nach dem male dat he sik des beward und in siner claghe beholden hefft.
7. Item also Hiszken claghe innehefft, dat Kene ende Fock Uken de borch to Yderhove wunnen scholden hebben etc., unde alse Kene darto antwerdet, se sin des unschuldich; segghe wi vor recht: dat he sik des entledighen mach mit synem ede, id en sy, dat me opembarliken by blickem schine de borch under eme bewisen moghe.
8. Item alse Hiszke claghet umme schaden, de gheschen is in Overledigherlanden in zylen unde dyken etc.; alse Kene darto antwordet, dat he noch sine vrund ne diike edder zyle in dem vorscreven lande hebben ingegraven edder inghebrand, und sy des unschuldich; spreke wi vor recht: bewiset Kene de unschult mit synem ede, he ne is dar vurder nichtes umme plichtich.
9. Item alse Hiszke Kenen schuldighet und Fock Uken, dat se schattinge genomen hebben van den dorpen, de bi deme Emezer strome liggen, und alse Kene darto antwerdet, se hadden dingtal ghemaket over de vorscreven dorpe binnen veide, dat also bevorwordet were, dat me de dinghtal mannen mochte, id worde vredet edder nicht; spreke wi vor recht: vulkumpt Kene des mit bewisinge, alse recht is, dat dat also sy, so en sin se dar vurder nichtes umme plichtich.
10. Item alse Hiszke claghet, dat Kene den zyl to Osterhusen hebbe upghedolven., und hebbe des 12 jar langh schaden gehat etc., unde alse Kene darto antwerdet, den zyl hebben ghebuwet, geleckt unde bekostighet Kenen undersaten und de brokman in Emezerlande etc.; segghe wi vor recht: is de schade bynnen vrede ghescheen, alse Hyszke schrifft, so schal Kene dorch recht Hiszken den schaden keren unde de vredebreke boten na rechte, alse vele alse he eme bekend, dat Hiszken an koesten toghebort hedde na ziilrechte; unde umme dat andere, dar an Kene Hiszken nenes rechten to en steit und Kene sik recht dar ane toschrift, des schulled se dorch recht theen in de kuntschopp; is it denne, dat de meste mennige der kuntschopp Hiszken einer rede tosteit, so schal Kene dorch recht den schaden ghelden; also vele alse de k-untschopp Hiszken unde den synen des tosteit, dar blift he billiken recht ane; wat aver Kene bewisen mach, dat binnen veide gheschen sy, alse he in synem andworde roret, dar is he nichtes umme plichtich.
11. Item alse Hiszke schrifft umme sin erve, dat eme afghemeyet sy umme Osterhusen etc., alse Kene darto antwerdet, do he wunne Osterhusen, do hebbe he dat land mede gewunnen spreke wi vor recht: hefft Kene to dem herschilde recht, wat he denne mit deme herschilde ghewunnen hefft in opembarer veyde und buten vrede, dat mach he mit rechte beholden.
12. Item alse Hiszke claghed umme ene buzen vul beres, in der Greet ghenomen etc., dar Kene to antwordet, id were Hamborger gud, dar hefft he sik mit en umme vordreghen, und hebben de van Emeden dar icht mede ghehat, dat hebbe he en ghenomen alse synen opembaren vyenden; spreke wi vor recht: bewiset Kene ene entseghede veyde mit den van Emeden unde bringed de to, alse recht is, so ne is he van ere weghene dar nichtes umme plichtich.
13. Item alse Kene in synem antworde int leste scrifft, alse allene dat he geantwordet hebbe to Hiszken claghe in dessen vorscreven artickelen, doch so hope he, dat he der antwerde nicht schuldich sy to donde, na deme dat dat compromisse clarliken inneholde etc.; spreke wi vor recht: wo dat gedeghedinget und willekored is, unde also me dat mit deme compromisse bewisen mach, dat id dorch recht dar billiken by bliven schal, na dem dat willekoer alle recht brikt.
Querele Haronis Idzerdes.
14. Item uppe ansprake und claghe Ennen van Norden unde Haren Idzerdes unde Kenen antworde van dem Broke: tom ersten, alse Hare Kenen anclaghet, dat he eme ghelovet hedde, dat slot in der Greed mit siner tobehoringhe eme wedder overtoghevende, wan de stede wedder uth dem lande weren etc., unde also Kene darto antwerdet, dat he der loffte unschuldich sy, unde wat he eme ghedan hebbe, dat sy gheschen binnen ener opembaren veyde etc.; spreke wi vor recht: Kene schal de unschult mit synem ede bewisen; bringet he ok to, alse recht is, wat he eme ghedan hebbe, dat he dat ghedan hebbe in ener opembaren entsechten veyde, so en is he ok eme dar vurder nichtes umme plichtich.
15. Item uppe alle claghe, de Enne van Norden deit van Osterhusen und van der twier Aylde wegen, van schattinge, van dotslaghe, rove, brande, in dorpen, landen, luden, erve iffte gude, dat to Osterhusen hebbe ghehort, unde alse Kene darto antwerdet, wat Enne van der weghene gheclaghet hefft, dat hebbe he mit eren ghedan und in opembarer veyde unde hebbe sik ok des vor beward mit den sendeboden der stede und ok na, er wen he jenighen vrede liden wolde etc.; spreke wi vor recht: kan Kene de veyde bewysen, alse recht is, des schal he gheneten; kan Kene des ok vulkomen und bewisen mit den sendeboden und mit deme compromisse, dat id alse sy, also he an synem antworde scrifft, so en darff he dorch recht dar vurder nicht to antwerden.
16. Item alse se claghet umme den man, den Kene schal uppe dat rad hebben ghelecht laten, und alse Kene darto antwerdet, he lete eme don, alse eneme vorredere, alse he were, dat he bewisen moghe etc.; spreke wi vor recht: kan Kene bewisen mit deme gherichte, dat he eme recht gedan hebbe, so en is he dar nichtes umme plichtich; vulkumpt he aver des also nicht, so schal he den doden dorch Gode und den vrunden beteren unde de vredebrake boten na rechte.
17. Item alse se claghet umme schaden, den Kene en ghedan hebbe in der borch to Pylsun unde den buren darsulves und in der Greet und in der borch to Norden etc., unde alse Kene darto antwerdet, wes an den borghen gheschen is, dat hebbe he gedan mit den steden mit eren in ener opembaren veyde, dar en zone over ghan sy etc., unde ok, dat he Ennen nener claghe to en sta, van der bure weghene to Pylsun und in der Greet; spreke wi vor recht: bringet Kene to, alse recht is, dat he dat in openbarer veyde gedan hebbe, so en is he van ere weghene dar vurder nichtes umme plichtich; tughet he ok de sone, alse recht is, dat de schicht ghesonet sy, so ne is he ok van rechte dar nichtes umme plichtich.
18. Item alse se claghet van deme hillighenguode und schaden, de dar an gheschen sy, uth der kerken to Pylsun und uth der Greet etc., und alse Kene dar to antwerdet, schade, de gheschen sy in hillighengude, dar bore em vor to antwerdende in gheistliker acht etc.; spreke wi vor recht, alse wi van schaden weghen umme hilligengud vor ghescheden hebben, umme Kenes ansprake und Hiszken antworde.
19. Item umme den schaden, den Kene schal gedan hebben to Plewerden etc., dar Kene to antwerdet, id in bore Ennen nicht to vordeghedinghende, nademe dat he sik mit deme hovetlinge, deme dat bore van rechte to vordeghedingende, hebbe wol vorscheden und vorsonet etc.; spreke wi vor recht: bewiset Enne, alse recht is, dat de schade eme edder den synen ghelde, und is eme de schade van Kenen gheschen buten veyde, so schal Kene dorch recht eme unde den synen den schaden wedderdon; heft denne Kenen dat so jennich hovetling overgheven, deme mach Kene dar umme tospreken, dat he ene ghewere.
20. Item also se Kenen schuldighet umme den torn to Erle und den he Luwerde affgewunnen hebbe in gudem loven etc., unde alse Kene darto antwerdet, de stede und he hebben dat mit eren ghedan umme der vitalienbrodere willen, de daruppe weren etc., und wes darane gheschen sy, dat sy ghesatet und ghesonet etc.; spreke wi vor recht: betughet Kene, alse sonerecht is, dat he des mit Luwerde unde Ennen ghesated und ghesonet sy, so ne is he dar vurder nichtes umme plichtich; vulkumpt he aver der bewisinge also nicht, so schal he dorch recht den schaden ghelden, den he boten vorwaringhe und ane entsegghinghe ghedan hefft. Und umme den schaden van deme hilligengude uthe den kerken to Erle und to Haghene, na ansprake und antworde, alse de inneholt, spreke wi vor recht, alse wi dat vore umme dat hilligengud gescheden hebben.
21. Item alse se Kenen schuldighet, dat he Volperde to Nenne sin slot schulle affgewunnen hebben binnen gudeme vrede etc., und alse Kene darto antwordet, wat he und de stede daran gedan hebben, dat sy gheschen binnen opembarer veyde und sy vorsonet etc.; spreke wi vor recht: kan Kene de veyde bewisen, alse recht is, so en is he eme dar van ere weghen nichtes umme plichtich; mach he ok de sone tobringen, alse sonerecht is, so ne is he ok van rechtes weghen dar nichtes umme plichtich. Unde umme dat hilligengud darsulves segge wi vor recht, alse wi dat vore ok umme ander hillighengud ghescheden hebben.
22. Item also Kene in synem antwerde int leste scrifft: alle claghe, de Ennen und syne erven anrored in synen vorscrevenen artickelen, de sin ghesated und vorsonet, und de hebbe Enne vororveidet, vorloved und vorsworen etc.; spreke wi vor recht: wes Kene Ennen des overtughen kan na sone unde orveyderechte, dat schal Enne dorch recht stede holden.
In orkunde der warheit, dat wi Meynhard unde Hinrik vorscreven dit overgheven hebbet van unser rade weghene vorscreven, so hebbe wi unse seghele benedden desse scrifft ghedrucket, int jar unses Heren 1409, des dinxedages na unser Vrowen daghe concepcionis, to Meppen.
1. Int erste alze Hysske in synem antworde to Kenes claghe roeret, dat Kene in dem banne sy unde darumme Kene nicht antworden dorve van rechte; segghe wi vor recht: al were Kene in deme banne und Hysske dat mit rechte bewiset hedde, doch nadem dat Hyske zik vorwillekort heft, dat he antworden wille, so schal he Kenen antworden to syner claghe.
2. Item alse Kene van Broke claghet uppe Hyszken van Emeden, uppe Ennen van Norden und uppe ere vrund, tom ersten alse he schrifft, dat Hyszke vorscreven sik vorplichted hedde mit breven und mit loften, den zylen unde den dyken to Valren nenerleyen schaden to donde etc., unde dat hirenboven Hyszke und syne vrunt hebben de vorscreven zyle inghebrand, dar Kenen ende den zynen unvorwinlik schade an gheschen sy, de hogher lope, den ene tunne goldes edder twe etc., unde alse Hyszke darto antwerdet, dat Kene vorscreven sete mit eme und synen vrunden in ener geswornen beseghelden sone, und sete mit em ok in enem vrede, den de stede mit erer beider willen gedeghedinget hedden etc., hirenboven hebbe Kene upghetoghen de zile to Osterhusen, und he und syne vrund hebben ok bynnen dersulven sone eme afgewunnen dat hus to Dethern und dat hus to Yderhove etc., unde umme desser vorscreven ghewelde und unrechtes willen hebbe he laten bernen den zyl Valren umme rechter notwere willen sines lives landes und gudes; hirup denket uns recht hedde Hiszke und syne vrund in der hantafftigen daet Kenen und synen helpern icht gedan darover, dat se de zile to Osterhusen uptoghen edder dat hus to Dethern edder Yderhove wunnen, alse dat in Hyszken antworde steit, wat se Kenen unde den synen darover gedan hedden, dat mochte me vor notwere rekenen; heft aver Hyszke unde de syne na der tyd Kenen und den synen den schaden ghedan alse syn claghe inneholt, unvorvolghet und unvorclaghed na rechte, so is id wedderwrake und nen notwere; und en heft Hiszke dat nicht utghedreghen, alse recht is, und en heft he Kenen na der sone nicht entsecht unde to den eren vorward, so schal he dorch recht de sonebrake und vredebrake vorboten unde den schaden ghelden na rechte.
3. Uppe den anderen artickel, alse Kene schrifft, Enne van Norden hebbe eme afghewunnen sin slot und stede to Lerlte an ener zekeren orveide boven loffte und ede etc., unde alse Ennen antworde darenteghen inneholt, dat he der loffnisse und orveide nicht en bekenne; hirup segghe wi vor recht: Kene mach Ennen des beth overtughen na rechte, den he eme des mit syner unschult entghan moghe, unde is de sone edder orveide vor gherichte schein, so mach he de tughen mit deme richtere und mit twen schepenen; is id aver ane gerichte gheschein, so mot he dat tughen zulf sovede vullenkomener lude an ereme rechte; unde betughet Kene de sone und orveide, alse vorscreven is, so schal Enne durch recht eme dat hus wedder antworden, na dem dat he bekand, dat he hebbe ghehulpen eme dat affghewunnen, und schal eme den schaden ghelden na rechte; wenne alse Enne schrifft, Kene hebbe ene vordreven und eme syne slot affgewunnen binnen magheschopp etc., dat scholde he durch recht vorvolghed und vorclaghet hebben und syk to den eren vorwart hebben, eer den he Kenen jenighen schaden gedan hedde; wor des nicht geschein is, dar mot he dat na rechte vorboten, alse vorgeroret is, umme der orveide unde sone willen.
4. Item alse Kene claghet umme schaden, de synen godeshusen, herben und hilligen gheschen sy van Hiszken unde synen vrunden, dar Hiszke to antwordet, dat he van rechtes weghene dar nicht schuldich to sy to antwerdende etc.; segghe wi vor recht: an wat kerken, der Kene de lenware heft edder de em van kuntschop des landes edder van rechtes weghene bort to vordegedingende, jenich schade gheschen is van Hyszken edder den synen, den schaden mach Kene vordern und esschen to der kerken behoef; aver umme overvangh, smaheit und unhorsam in Hyszke Kenen nenes antwerdendes plichtich.
5. Item uppe ansprake unde claghe Hiszken provestes to Emede und uppe antwerde Kenes van dem Broke: tom ersten alse he ene ansprikt, dat in deme jare unses Heren 1407, ipso die Michahelis (29. September), he schal gerovet hebben dat kerspel to Yderhove in Overledigher. lande etc.; item als, he ene ansprikt, dat in demezulven jare, alse in sunte Sebastianes daghe (20. Januar), he lach vor der borch to Yderhove etc.; item uppe datsulve jar, dat he scholde gherovet unde gebrand hebben Wolkmedehusen und Hallingmore etc.; item in deme jare 1408, dat he schal gewunnen hebben Detherde etc.; item dat he deszulven jares schal gestortet hebben to Nymramore twe borghe etc.; alse Kene to allen vorscreven artickelen mit enerne antwerde antwordet, dat de vorsonet syn; spreke wi vor recht: kan Kene des vullenkomen und de sone bewisen, alse recht und alse hir vorgerort is uppe Kenen claghe und Ennen antworde, so en is he dar vorder nichtes umme plichtich.
6. Item alse Hiszke claghet van schaden, de eme ghescheen is van Kenen to Rawida, item to Andorpe, item to Bokemore, item to Volsneborch, item to Kollingehorst, item to Pophteshusen; item in des bisschoppes frede van Munster, dat Fock Uken schal gerovet hebben 6 perde to Bokemore; item int jar unses Heren 1409 uppe sunte Gregories dach (12. März), dat Focke Uken schal gherovet hebben dat kerspel to Yderhove; item int jar 1409, dat he schal schaden ghedan hebben, to Nesse etc.; item dat he schal inghegraven hebben dat olde zildeip to Westerhusen; item dat syne vrund den Emederen affgheslaghen hebben 6 man; item dat Fock Uken schal gheschattet hebben van den Emederen 800 ghuldene, unde twe vanghene man noch in deme stocke hebbe, unde ene geladene schuten, also gud alse 400 ghuldene, ghenomen hebbe; item umme schaden, den he schal gedan hebben in Westerlande by der Emeze, alse 2 par ossen, 5 koy, 4 stighe schapp etc.; alse Kene to allen neghest vorscrevenen artikelen mit eneme antwerde antwordet, dat de gheschen sin in opener veyde, na der tyd, dat de zil to Valren inghebrand und Lerlte gewunnen wart; spreke wi vor recht: kan Kene dat bewisen, alse recht is, dat de stucke alle in veyde gheschen syn, so en darf he dar nicht to antwerden; were ok, dat dat vor Emeden zunderken affghesecht were, so ne is he dar vurder nenes antwordendes umme plichtich, nach dem male dat he sik des beward und in siner claghe beholden hefft.
7. Item also Hiszken claghe innehefft, dat Kene ende Fock Uken de borch to Yderhove wunnen scholden hebben etc., unde alse Kene darto antwerdet, se sin des unschuldich; segghe wi vor recht: dat he sik des entledighen mach mit synem ede, id en sy, dat me opembarliken by blickem schine de borch under eme bewisen moghe.
8. Item alse Hiszke claghet umme schaden, de gheschen is in Overledigherlanden in zylen unde dyken etc.; alse Kene darto antwordet, dat he noch sine vrund ne diike edder zyle in dem vorscreven lande hebben ingegraven edder inghebrand, und sy des unschuldich; spreke wi vor recht: bewiset Kene de unschult mit synem ede, he ne is dar vurder nichtes umme plichtich.
9. Item alse Hiszke Kenen schuldighet und Fock Uken, dat se schattinge genomen hebben van den dorpen, de bi deme Emezer strome liggen, und alse Kene darto antwerdet, se hadden dingtal ghemaket over de vorscreven dorpe binnen veide, dat also bevorwordet were, dat me de dinghtal mannen mochte, id worde vredet edder nicht; spreke wi vor recht: vulkumpt Kene des mit bewisinge, alse recht is, dat dat also sy, so en sin se dar vurder nichtes umme plichtich.
10. Item alse Hiszke claghet, dat Kene den zyl to Osterhusen hebbe upghedolven., und hebbe des 12 jar langh schaden gehat etc., unde alse Kene darto antwerdet, den zyl hebben ghebuwet, geleckt unde bekostighet Kenen undersaten und de brokman in Emezerlande etc.; segghe wi vor recht: is de schade bynnen vrede ghescheen, alse Hyszke schrifft, so schal Kene dorch recht Hiszken den schaden keren unde de vredebreke boten na rechte, alse vele alse he eme bekend, dat Hiszken an koesten toghebort hedde na ziilrechte; unde umme dat andere, dar an Kene Hiszken nenes rechten to en steit und Kene sik recht dar ane toschrift, des schulled se dorch recht theen in de kuntschopp; is it denne, dat de meste mennige der kuntschopp Hiszken einer rede tosteit, so schal Kene dorch recht den schaden ghelden; also vele alse de k-untschopp Hiszken unde den synen des tosteit, dar blift he billiken recht ane; wat aver Kene bewisen mach, dat binnen veide gheschen sy, alse he in synem andworde roret, dar is he nichtes umme plichtich.
11. Item alse Hiszke schrifft umme sin erve, dat eme afghemeyet sy umme Osterhusen etc., alse Kene darto antwerdet, do he wunne Osterhusen, do hebbe he dat land mede gewunnen spreke wi vor recht: hefft Kene to dem herschilde recht, wat he denne mit deme herschilde ghewunnen hefft in opembarer veyde und buten vrede, dat mach he mit rechte beholden.
12. Item alse Hiszke claghed umme ene buzen vul beres, in der Greet ghenomen etc., dar Kene to antwordet, id were Hamborger gud, dar hefft he sik mit en umme vordreghen, und hebben de van Emeden dar icht mede ghehat, dat hebbe he en ghenomen alse synen opembaren vyenden; spreke wi vor recht: bewiset Kene ene entseghede veyde mit den van Emeden unde bringed de to, alse recht is, so ne is he van ere weghene dar nichtes umme plichtich.
13. Item alse Kene in synem antworde int leste scrifft, alse allene dat he geantwordet hebbe to Hiszken claghe in dessen vorscreven artickelen, doch so hope he, dat he der antwerde nicht schuldich sy to donde, na deme dat dat compromisse clarliken inneholde etc.; spreke wi vor recht: wo dat gedeghedinget und willekored is, unde also me dat mit deme compromisse bewisen mach, dat id dorch recht dar billiken by bliven schal, na dem dat willekoer alle recht brikt.
Querele Haronis Idzerdes.
14. Item uppe ansprake und claghe Ennen van Norden unde Haren Idzerdes unde Kenen antworde van dem Broke: tom ersten, alse Hare Kenen anclaghet, dat he eme ghelovet hedde, dat slot in der Greed mit siner tobehoringhe eme wedder overtoghevende, wan de stede wedder uth dem lande weren etc., unde also Kene darto antwerdet, dat he der loffte unschuldich sy, unde wat he eme ghedan hebbe, dat sy gheschen binnen ener opembaren veyde etc.; spreke wi vor recht: Kene schal de unschult mit synem ede bewisen; bringet he ok to, alse recht is, wat he eme ghedan hebbe, dat he dat ghedan hebbe in ener opembaren entsechten veyde, so en is he ok eme dar vurder nichtes umme plichtich.
15. Item uppe alle claghe, de Enne van Norden deit van Osterhusen und van der twier Aylde wegen, van schattinge, van dotslaghe, rove, brande, in dorpen, landen, luden, erve iffte gude, dat to Osterhusen hebbe ghehort, unde alse Kene darto antwerdet, wat Enne van der weghene gheclaghet hefft, dat hebbe he mit eren ghedan und in opembarer veyde unde hebbe sik ok des vor beward mit den sendeboden der stede und ok na, er wen he jenighen vrede liden wolde etc.; spreke wi vor recht: kan Kene de veyde bewysen, alse recht is, des schal he gheneten; kan Kene des ok vulkomen und bewisen mit den sendeboden und mit deme compromisse, dat id alse sy, also he an synem antworde scrifft, so en darff he dorch recht dar vurder nicht to antwerden.
16. Item alse se claghet umme den man, den Kene schal uppe dat rad hebben ghelecht laten, und alse Kene darto antwerdet, he lete eme don, alse eneme vorredere, alse he were, dat he bewisen moghe etc.; spreke wi vor recht: kan Kene bewisen mit deme gherichte, dat he eme recht gedan hebbe, so en is he dar nichtes umme plichtich; vulkumpt he aver des also nicht, so schal he den doden dorch Gode und den vrunden beteren unde de vredebrake boten na rechte.
17. Item alse se claghet umme schaden, den Kene en ghedan hebbe in der borch to Pylsun unde den buren darsulves und in der Greet und in der borch to Norden etc., unde alse Kene darto antwerdet, wes an den borghen gheschen is, dat hebbe he gedan mit den steden mit eren in ener opembaren veyde, dar en zone over ghan sy etc., unde ok, dat he Ennen nener claghe to en sta, van der bure weghene to Pylsun und in der Greet; spreke wi vor recht: bringet Kene to, alse recht is, dat he dat in openbarer veyde gedan hebbe, so en is he van ere weghene dar vurder nichtes umme plichtich; tughet he ok de sone, alse recht is, dat de schicht ghesonet sy, so ne is he ok van rechte dar nichtes umme plichtich.
18. Item alse se claghet van deme hillighenguode und schaden, de dar an gheschen sy, uth der kerken to Pylsun und uth der Greet etc., und alse Kene dar to antwerdet, schade, de gheschen sy in hillighengude, dar bore em vor to antwerdende in gheistliker acht etc.; spreke wi vor recht, alse wi van schaden weghen umme hilligengud vor ghescheden hebben, umme Kenes ansprake und Hiszken antworde.
19. Item umme den schaden, den Kene schal gedan hebben to Plewerden etc., dar Kene to antwerdet, id in bore Ennen nicht to vordeghedinghende, nademe dat he sik mit deme hovetlinge, deme dat bore van rechte to vordeghedingende, hebbe wol vorscheden und vorsonet etc.; spreke wi vor recht: bewiset Enne, alse recht is, dat de schade eme edder den synen ghelde, und is eme de schade van Kenen gheschen buten veyde, so schal Kene dorch recht eme unde den synen den schaden wedderdon; heft denne Kenen dat so jennich hovetling overgheven, deme mach Kene dar umme tospreken, dat he ene ghewere.
20. Item also se Kenen schuldighet umme den torn to Erle und den he Luwerde affgewunnen hebbe in gudem loven etc., unde alse Kene darto antwerdet, de stede und he hebben dat mit eren ghedan umme der vitalienbrodere willen, de daruppe weren etc., und wes darane gheschen sy, dat sy ghesatet und ghesonet etc.; spreke wi vor recht: betughet Kene, alse sonerecht is, dat he des mit Luwerde unde Ennen ghesated und ghesonet sy, so ne is he dar vurder nichtes umme plichtich; vulkumpt he aver der bewisinge also nicht, so schal he dorch recht den schaden ghelden, den he boten vorwaringhe und ane entsegghinghe ghedan hefft. Und umme den schaden van deme hilligengude uthe den kerken to Erle und to Haghene, na ansprake und antworde, alse de inneholt, spreke wi vor recht, alse wi dat vore umme dat hilligengud gescheden hebben.
21. Item alse se Kenen schuldighet, dat he Volperde to Nenne sin slot schulle affgewunnen hebben binnen gudeme vrede etc., und alse Kene darto antwordet, wat he und de stede daran gedan hebben, dat sy gheschen binnen opembarer veyde und sy vorsonet etc.; spreke wi vor recht: kan Kene de veyde bewisen, alse recht is, so en is he eme dar van ere weghen nichtes umme plichtich; mach he ok de sone tobringen, alse sonerecht is, so ne is he ok van rechtes weghen dar nichtes umme plichtich. Unde umme dat hilligengud darsulves segge wi vor recht, alse wi dat vore ok umme ander hillighengud ghescheden hebben.
22. Item also Kene in synem antwerde int leste scrifft: alle claghe, de Ennen und syne erven anrored in synen vorscrevenen artickelen, de sin ghesated und vorsonet, und de hebbe Enne vororveidet, vorloved und vorsworen etc.; spreke wi vor recht: wes Kene Ennen des overtughen kan na sone unde orveyderechte, dat schal Enne dorch recht stede holden.
In orkunde der warheit, dat wi Meynhard unde Hinrik vorscreven dit overgheven hebbet van unser rade weghene vorscreven, so hebbe wi unse seghele benedden desse scrifft ghedrucket, int jar unses Heren 1409, des dinxedages na unser Vrowen daghe concepcionis, to Meppen.
