| Nummer:oub1776 | Datum:8. Aug. 1434 | Overlevering:Editie | Vindplaats:Ostfriesisches Urkundenbuch, II, S. 737, nr. 1776 |
Der Abt von Sielmönken und die Pfarrer von Pewsum und Kanum bekunden, dass Ouke Dyudisna zu Manslagt sein Haus und Warf dem. Häuptling Lutet zu Bargerbuhr übertragen, dieser aber dem Ouko den Niessbrauch davon auf Lebenszeit belassen habe.
Wy her Walter, van Godes gnaden abbet to Zylmonken des orden sunte Benedicti, in Emsingherland under den stichte to Munster, her Jarich und her Reembet, kerckheren to Pewesum und Kanynghen, bekennen und betuygen clarlicken in der warheyt vor alsweme in dessen opene besegelden breve, dat wy dar yeghenwordich, an und over hebben gewesen, dat Ouke Dyudisna tho Manslacht gaff und hefft gegheven by sunden lyve, vorberaden modes, myt volbord und consent syner huysvrouwen deme vorsichtigen manne Lutet, hovetling to Berghum und Wyliff, [*] huyss und werff mit zyn tobehoringhe und alle syn erve und gud samentliken, beyde replick und unrepplick, myt vreden und gemake stedes to besitten und to bruken in voller macht gelyck syn vaderlicke erve sunder alle wedersprake. Des so hefft Lutet vorbenomet Ouke und syn huysvrouwe vorg. dit sulve huyss und erve weder vorleend to bruken und to besitten dewyle dat se leven. In orkunde der warheyt so hebben hyr mede, an und over gewesen Sybe Egghen to Pilsum, Redeleff[*] und Hibeke, inwoners to Pewesum und anders vele gude lude. Des to tuge um[*] euerer bewysinge der warheyt so hebbe wy her Walter, abbet des vorg. coventes (sic), her Jarich und her Reembet, kerckheren ergenampt, unse insegele witliken hangen heten to dessen breve. Screven[*] na Godes borth duysent veerhundert veer und dertich, des sondages na Ad vincula Petri.
