Burgemeesteren en Raad in Groningen oorkonden, dat de voogden van Sunte Wolberge kerk met toestemming van heer Mr. Johan Vredewold, proost van Emeden, kerkheer, van Mr. Berend Pistoris, vicecureet der kerken van Sunte Merten en Sunte Wolburge, en van den gemeenen Raad voor hen verklaarden verkocht en overgedragen te hebben aan Heer Johan van Munster, pater van het klerkenhuis bij Sunte Wolburgekerk, ten behoeve van het huis en van de gemeene broeders aldaar, een erf geheeten 'Sunte Walburgekerken Appelhoff', benevens de 4 kameren, die daarop staan, o.a. ten zuidoosten grenzend aan het erf en huis van het voorn. klerkenhuis; met bepalingen aangaande betimmeringen, afwateringen en een gemeene weg.

Wy borgermestere ende Raed in Groningen betugen myt dessen openen breve dat voer ons sint gekomen die
vogeden ............van sunte Wolburge kercke in onser stad by consente des Ersamen heren meyster Johanne
Vredewoldt provdst van Emeden onsen Kercheren ende meyster Berend Pistoris vicecureet onser kercken to sunte
Merten ende sunte Wolburgen ende by consente onses gemenen Raedes inder tyt Ende bekanden voer em ende
oeren nakomelingen vogeden dat sie hebben verkofft upgedragen ende overgegeven drogen up ende gaven over
heren Johanne van Munster inder tyt pater des clerchuuses by sunte Wolburge kercke vors. tot behoeff des huuses
vors. ende den gemenen broders aldaer ende oeren nakomelingen Een stucke erves als sunte Wolburge kercken
Appelhoff myt den vier kameren die de vogeden in voertijden daer up getymmert hebben welker vors. erve ende
appelhoff s recket zijch myt den zuetoestereynde an des vors. clerhuuses erve ende huusinge daer onser stad erve
bylanges hen gaet ende naest by licht up die norder zyd daer de broders des huuses vors. bylanges hen mogen
tymmeren van oere uterste norderste mure die tegens onser mure over gelegen is westwert lynrecht uut van oere
horner der muren na der horne vander Jacopyner nyer mure van oeren appelhove die oeck bylanges aldaer by onser
stad erve hen gaende is. Ende de gemenen wateringe tot den zijll sall buten der vors. breder tymmer doer onsen
stad erve hen gaen dat wy gemene Raed vorgen. up dat voers. erve geeyschet also bepaelt togestaen
ende gewesen hebben. Ende up de wester zyd tusschen dessen vors. appelhoff ende der Jacopynre nyer mure van
oeren appelhove sall een gemene wech liggende bliven tot ewygen dagen zuuden ende noerden uutgaende
die vijffteijn voete breet sall wesen belangen vander nyer Jacopijner mure ende huusinge tot allen steden oestwert
aff to meten welker vors. wech die broders vorgen. mede vry mogen bruken tot ewygen tyden tot allen steden in
ende uut to varen myt wagenen karen gaen ende ryden ende wes em noet is daer doer in ende over te doende tot
den erve vors. lucht te hebben doeren ende uutslagen vensteren westwert uut to maken offte sie bylanges den
wech tymmeren wolden Ende up de zuuderzyd sall liggende bliven Elven voete breet erves vanden Appelhoff v rs.
bylanges den huuse daer Homme nu ter tyt ynne woent ende den kameren die daer achter gelegen sint nortwert aff
to meten Ende die vogeden inder tyt mogen de vors. Elve voete breet erves betymmeren
ende orbaren tot der kercken beste In wat manieren em des genoget buten der vors. brdere wederseggen
ende bekroninge. Beholdenden broders vors. een druppelvall ende ene wateringe aff ende hen to wateren up de
vors. Elve voete erves. Des so sullen de broders vors. oeck hebben int westen oers erves drie voete erves inde
brede achter van sunte Wolburge kercken erve dat nu ter tijt her Johan Gloede bruket so alse die vogeden
vorgen. den broders vors. dat togepaelt hebben. Ende die broders vors. mogen up die norderzyd byder stad erve
upt weste byde vijffteyn voete ende up die zuuder zyd naest by Elven voete ende up die drie voeten by her Johan
Gloeden erve muren leggen ende dair up tymmeren ende upt zuuder westen noerden ende by her Johan Gloeden
arven aff ende hen wateren up dense vors. erven noyt oere druppen ende wateringen vry ende quit erffliken ende
ewliken myt allen rechten ende eygendoeme to bruken ende to besitten voer ene summe geldes die de vogeden
vorgen. bekanden dat em vull ende all is betaelt tot behoeff der kercken vors. ende sodane erfflike rente die em
tot oeren wyllen daer toe overgegeven is daer den vogeden vors. wall angenoget by consente der kercheren vors.
ende onses gemenen Raedes tot behoeff der kercken vorgen. Beholdende der kercken vors. ene wateringe van oere
erven nortwert doer dessen vors. Appelhoff to wateren myt oer water dair men gene onrynicheit van secreeten van
verkenschote offte enige onreynicheyt doer leyden sall. Ende geschiede dair en boven van enige onreynicheyt
dair doer te Leyden als vors. is gedaen worde Ende de broders vors. zijch des bekroenden eens ende anderwarff
myt rechte offte vrentscappen Ende dan niet gebetert en worde so mogen de broders vors. die vors. wateringe
dan teslaen ende demmen so vake als dat geschiet ende toholden ter tyt dattet gebetert wort sunder yemandes
wederseggen sunder argelist. Dat orkonde wy myt onser stad zegell Ghegeven inden jaer ons heren dusent
vierhundert sovenendetsestich des dinxdages na sunte Mertens dach inden winter.
Doe Henrick........ Johan Scaffer .........borgermestere waeren onser stad.

x

x

Archief	Groninger Archieven
Fonds	Arch. Parochiekerken
Toegangsnummer	1539
Inventarisnr.	0020
Regestnr.	228
Register Feith	1467.011.1
Jaar	1467
Datumcode	MpMartin

x

x

x

Materiaal	perkament