| Nummer:ugk093 | Datum:7. Mai 1493 | Overlevering:Original | Vindplaats:Grimersumer Kiste, inv.nr. 093 |
Die Witwe des Haytet Poptetsna zu Westerhusen, Eyta, übereignet dem Häuptling und Propst Gerold Beninga ein halbes Gras Landes, welches ihr verstorbener erster Gemahl Freyd Foelriksna dem Aild Beninga zugesagt hatte.
Ick Eyta, naghelatene husvrouwe Hayteth Poptetsna to Westerhusen saliger ghedechtnisse, enkenne unde tughe openbair yn dessen openen beseghelden breve, dat ick myt vryen willen unde wall vorberadene mode, unbedwungen, hebbe toghestaen, to gude schulden unde overghegeven, unde in krafft dessen breves tegenwordich tosta, to gude scheide unde overgheve deme ersamen, duchtigen Gherolde Beninga, proest to Hint unde hovetling to Grymetsum, eyn half gras landes, belegen in Norder meer; welk halff gras landes Freyd Foelricksna saliger ghedechtnisse er echteman synen leven vader Ayeld Beninga, proest to Hint unde to Grymatsum hovetling, milder dechtnisse, yn vorledenen yaren hadde overghegeven unde toghestan, do he de vruntscop makede tuschen Egge Hobbena unde eren erfguderen, also dat Gherolt proest vorben. unde syne rechten anervenden mogen dat ghebruken, besitten unde (eren) willen darmede doen int ewich sunder alle arghelist unde nije funde in ghestliken eder werliken rechten. Hijr weren mede, bij, an unde over tugheslude, benamen de erberen unde ghestliken manne, mester Hildrick van Uthlo, kerckhere to Hint, her Gherardus Wulf, prebendat darsulffs, her Johannes Dottingum unde her Jacobus Wesalie, prestere to Syelmoenken, unde Ymele Smyt, to Hint ynwoner. In orkunde der warheit, so hebbe ick Eyta vorben. vruntliken ghebeden de erberen heren mester Hildrick, kerckheren, unde hern Gheerdt Wulf vorben. erer beyder inghesegel an dessen breff to hangende, deme wij meister Hildricus unde Gherardus so gherne hebben ghedaen, unde unser beyder inghesegel an dessen breff witliken ghehangen. Datum na der bord Christi Mo CCCCo XCIIIo, am dinxdaghe na Johannis ante portam Latinum.
x
| Commentaar | Die beiden anhängenden Siegel sind erhalten. Friedländer schreibt: Siegel: 1. Der h. Petrus, in der Rechten den Schlüssel, mit der Linken einen Schild vor sich haltend, auf dem zwischen 2 Flügen ein h. Umschrift: ... Uthlo presbyteri. 2. Ein Engel hält mit beiden Armen einen Schild zu seinen Füssen, in dem ein rechter Schrägbalken und in diesem ein rechtsspringender Wolf. Umschrift: S. Gherardi Wulf presbyteri. |
|---|