Ministra Ghertruut ter Hove en de gemene zusters van het convent van Nazareth te Oen verklaren dat het convent te Essen de Haghenscamp, die door abdis Wiichmoet en het convent van Essen aan Nazareth verkocht is, terug mag kopen voor de som van 200 gouden overlandse rijnse guldens, omdat Jan Haghe de Jonghe de kamp wil "lossen".

Wy Ghertruut ter Hove ministra ende ghemeene zusteren des convents van Nazareth in Oen gheleghen vander derder oirde
sunte Franciscus bekennen in desen openen brieve voir ons ende onse nacommelinghen hoewael dat die brief den ioncfer Wiich-
moet abdisse des convents van Essen ende dat convent voirscreven onsen convente van Nazareth voirscreven ghegheven ende verliet heeft
erflic holt inholdende vanden erfcoep des landes gheheten Haghens camp nochtant want sake dat Jan Haghe die jon-
ghe den voirscreven camp lossen wolde vanden convente van Essen voirscreven na uutwisinghe eens maechsceyts briefs soe mo-
ghen dan ioncfer Wiichmoet abdisse ende convent van Essen voirscreven of oir nacomelinghen den voirscreven camp lants we-
der lossen of copen alle iair tusschen midwinter ende sunte Peter ad cathedram van onsen convente van Nazareth voirscreven
mit twee hondert golden overlensche riinsche gulden voir datum des briefs gheslaghen of die wairde dair voir
ende wanneer die summe ghelts voirscreven an onsen convente voirscreven betaelt is soe sullen wy zusteren des convents voirscreven of
ons ghewairde bode des lants voirscreven weder uut gaen voir den thinsheren tot behoef des cloesters of convents van
Essen of des ghenen den sy dat gonnen ende betalen dan to scriifgelde ende thinse viif olde groten ende niet meer, al sonder
erghelist. In oirkunden der wairheit soe hebben wy ministra ende zusteren des convents voirscreven ons convents zeghel voir ons ende
onse nacommelighen [sic] an desen brief doen hanghen inden iair ons heren dusent vierhondert ende enentsestich op sunte
Lucien dach der heiligher ioncferen.

x

x

Archiv	Groninger Archieven
Bestand	Kloosterarch.
Zugangsnummer	172
Inventarnr.	151
Regestnr.	439
Olim	Arch. Klooster Essen, inv.nr. 2, reg. 54. Reg. Feith 1461.26.
Jahr	1461
Datumcode	Lucie

x

x

Kommentar	Met het zegel van het klooster Nazareth

x

Material	perkament

x