Burgemeesters en raad te Gronyngen verklaren dat Jacob Grovens en zijn vrouw Eteke hebben geschonken en overgedragen aan de abt en het convent te Felweert bij den Damme de Emenvenne, groot zes grazen, met het Butke, begrensd ten oosten door Watemer Groen, ten zuiden door de Hayenvenne en ten noorden door Oesterwerum met de Rettighevenne, voorts het heem waarop de Addyngheweer staat, groot zeven grazen, begrensd ten noorden door de dijk, ten oosten door Oesterwerum, ten zuiden door de Langheweer en ten westen door de Warcke, verder de Poelen, groot drie grazen, begrensd ten zuiden door de Tyochte, en tenslotte hun deel van de Berumster uiterdijk en de aanwas, waarvoor zielemissen gehouden zullen worden voor hemzelf en voor hun verwanten en waarvoor zij en hun zoon Henrick worden opgenomen in de broederschap van het klooster.

Wy borgermestere ende raed in Gronyngen betughen myt desen
openen breve dat voer ons synt ghecomen Jacob Grovens ende
Eteke syn echte huusfrouwe Ende bekanden voer em ende hoeren
arffgenamen dat se hebben ghegeven purlicke omme godes willen droeghen
op ende gheven over in cracht breves den Abte ende convente toe
Ffelweert by den Damme gheleghen anders gheheten te Olden cloester
In den eersten de Emen venne myt dat Butken daer by geleghen
ende dat hem is toe samen sees grasen daer by ter zwette licht
opt Oesten Watemer Groen opt zuden Jacob vorscr. selven
myt Hayen Venne gheheten opt westen Schelteke Kannemaker
myt eenre venne gheheten De Groete Gaer opt noerden de van
Oesterwerum myt de Rettighe venne Item bet een heem daer
dat huus op plach toe staen gheheten de Addynghe weer mytt
Soven grase landes daer by ter zwette licht de dijck opt norden
ende de van Oesterwerum op oesten Anteke Akens op zuden myt enre
vennen gheheten de Langheweer Ende Gayke Sippens opt westen
myt enre vennen gheheten de Wencke Item de poelen streckende
int westen by langhes de dijck van Addingheweer dre graesen
groet Daer by ter zwette licht Remke Lewerdes op zuden myt
enre vennen gheheten de Tyochte Ende oeck op westen myt een deel
poelen Daer toe sal dat convent voerscr. hebben alle Berumster
uuterdijck myt alle syn verbeterynge ende anworp de hem beyden
toe behoert Beholden enen yeweliken syn landt de dijke mede
toe maeken welke uuterdijck op streckenkende (sic) is ande wester
zijdt op den sloet der scheidinghe tuschen de Spikesters ende Berum-
sters Daer voer sullen dat convent voerscr. toe ewighen
tijden alle daeghe ene mysse holden de vromysse oft hoe-
mysse hoe den convente dat dan best geleghen is myt anderen
myssen Dese myssen sollen wesen ter weken dre van alle karsten
ghelovyghe zielen Ende van der hilgher drevoldicheit ene vanden
hilghen geest ende van den hilghen cruce ene ende ene van onser
liever vrouwen Om toe bidden voer Jacob ende Eteke voerscr.
Ende voer hoere beyder vrende zielen zalicheit Ende sollen mede
daer van begaen toe ewighen daeghen Inden voerscr. convente
elkes iaers toe twen tyden des iaers Henrick Grovens ende
Ebbe Sluchtynghe Jacobes ende Etekens voerscr. vaders Heren
Sluchtyngh Etekens voerscr. broder Junghe Henrick Grovens
Jacopes ende Eteke voerscr. soene saliger ghedachtnisse Toe samen
toe meye Alyt Grovens ende Wije Sluchtinge Jacobs ende Etekens
voerscr. moders Duert ende Teteke Etekens voerscr. alde vader
ende moder saliger ghedachtnisse toe samen toe myd wynter Ende
de darde begancknysse sal wesen voer Jacob ende Eteken voerscr.
als se nijet en synt op den starff dach de laeste van hen beiden
sterfft Ende sollen Jacob ende Eteke voerscr. ende salighe Henrick
Grovens oeren sonene van studen an in de broderscapp wesen des
convents scriven ende holden Oeck sollen dat convent voerscr. dese
voerscr. myssen ende begancknisse voert hijr nae van stonden
an doen ende holden toe ewighen daeghen als voerscr. is
Oft oeck dat convent voerscr. dit versumede ende nyet en helden
in allen maenden als voerscr. is in enyghen punten Soe sullen
ende moeghen Jacob ende Eteke voerscr. oft enen van em beiden Oft
oere beider eerffgenamen voerscr. lant ende uuterdijck weder an
em nemen ende ghebruken ter eren godes toe schickende waer
em dan des best belevet sunder weder spreken des conventes
voerscr. sunder argelijst. Dat oerkunde wy myt onsser Stad zegel
ghegeven inden jaer ons heren dusent vierhundert achtentachtich
des doenredaeges naden Soendage reminiscere doe Johan Tedema,
Garmet Allema, Roloff Ulgers ende Harmen Lewe borgermesters
weren onser stad.

x

x

Archiv	Groninger Archieven
Bestand	Kloosterarch.
Zugangsnummer	172
Inventarnr.	2
Fol. Nr.	fol. 03r
Regestnr.	761
Olim	Losse kloosterstukken, inv.nr. 1, reg. 53. Reg. Feith 1488.19.
Jahr	1488
Datumcode	JpRemini

x

x

x

Material	perkament